CRPF Soldier Killed | మణిపూర్‌లో తీవ్రవాదుల ఆకస్మిక దాడి.. సీఆర్పీఎఫ్‌ జవాన్‌ మృతి

CRPF Soldier Killed | మణిపూర్‌లో హింసాత్మక సంఘటనలు కొనసాగుతున్నాయి. అనుమానిత తిరుగుబాటుదారుల దాడిలో సెంట్రల్ రిజర్వ్ పోలీస్ ఫోర్స్ (సీఆర్పీఎఫ్‌) జవాన్‌ మరణించాడు. జిరిబామ్ జిల్లాలో ఈ సంఘటన జరిగింది.

ఇంఫాల్‌: మణిపూర్‌లో హింసాత్మక సంఘటనలు కొనసాగుతున్నాయి. అనుమానిత తిరుగుబాటుదారుల దాడిలో సెంట్రల్ రిజర్వ్ పోలీస్ ఫోర్స్ (సీఆర్పీఎఫ్‌) జవాన్‌ మరణించాడు. (CRPF Soldier Killed) జిరిబామ్ జిల్లాలో ఈ సంఘటన జరిగింది. అస్సాం సరిహద్దు జిల్లా ప్రాంతంలో పారామిలిటరీ సిబ్బంది, రాష్ట్ర పోలీసులు సంయుక్తంగా గస్తీ నిర్వహిస్తుండగా తీవ్రవాదులు ఆకస్మికంగా దాడి చేశారు. పెట్రోలింగ్‌ వాహనం సమీపంలో సీఆర్పీఎఫ్‌ జవాన్‌ నడుస్తూ వెళ్తుండగా తిరుగుబాటుదారులు కాల్పులు జరిపారు. ఈ సంఘటనలో సీఆర్పీఎఫ్‌ జవాన్‌ మరణించగా, ఆ వాహనంలో ఉన్న ఇద్దరు పోలీస్‌ కమాండోలు గాయపడ్డారు. జవాన్లు ఎదురు కాల్పులు జరుపడంతో తీవ్రవాదులు అటవీ ప్రాంతంలోకి పారిపోయినట్లు సీనియర్‌ పోలీస్‌ అధికారి తెలిపారు. ఆ ప్రాంతంలో కూంబిగ్‌ ఆపరేషన్‌ జరుగుతోందని అన్నారు.

కాగా, మణిపూర్ సీఎం ఎన్ బీరెన్ సింగ్ ఈ సంఘటనపై స్పందించారు. సీఆర్పీఎఫ్‌ జవాన్‌ను చంపడాన్ని ఖండించారు. కుకీ తీవ్రవాదుల దాడిగా అనుమానం వ్యక్తం చేశారు. గాయపడిన పోలీస్‌ కమాండోలు త్వరగా కోలుకోవాలని ఎక్స్‌ పోస్ట్‌లో పేర్కొన్నారు.