Visit:
Nishikant Dubey : మాజీ ప్రధాన మంత్రులు (Ex PMs) జవహర్లాల్ నెహ్రూ (Jawaharlal Nehru), ఇందిరాగాంధీ (Indira Gandhi) లపై బీజేపీ సీనియర్ నేత, ఎంపీ నిషికాంత్ దూబే (Nishikant Dubey) సంచలన ఆరోపణలు చేశారు. ఆ ఇద్దరు ప్రధానులు భారత్లోని ఒక పర్వతంపై నిఘా పరికరం అమర్చేందుకు అమెరికా (USA) కు అనుమతిచ్చారని ఆరోపించారు. ఈ మేరకు ఇవాళ (సోమవారం) ఎక్స్ వేదికగా ఆయన ఒక పోస్టుపెట్టారు.
చైనా కార్యకలాపాలపై నిఘా కోసం మన దేశంలో అమెరికాకు చెందిన సెంట్రల్ ఇంటెలిజెన్స్ ఏజెన్సీ నేతృత్వంలో కోవర్ట్ ఆపరేషన్ దశలవారీగా జరిగిందని, నెహ్రూ హయాంలో తొలిసారి అణు ఆధారిత నిఘా పరికరాన్ని నందాదేవీ పర్వత శిఖరాన (ఉత్తరాఖండ్లోని) అమర్చేందుకు అనుమతించారని దూబే తన పోస్టులో పేర్కొన్నారు. తర్వాత ఇందిరాగాంధీ హయాంలోనూ అందుకు అనుమతి లభించిందని ఆరోపించారు.
ఆ తర్వాత అగ్రరాజ్యం నందాదేవి నుంచి తన కార్యకలాపాలను ఉపసంహరించుకుందని దూబే తెలిపారు. పర్యావరణపరంగా సున్నితమైన హిమాలయన్ ప్రాంతంలో ఆ ప్రమాదకర పరికరాన్ని వదిలేసి వెళ్లిపోయిందని పేర్కొన్నారు. ఉత్తరాఖండ్ నుంచి బెంగాల్ వరకు గంగానది ఒడ్డున నివసిస్తున్న ప్రజల్లో క్యాన్సర్ కేసులు పెరగడానికి ఇది కారణం కాదా..? అని ప్రశ్నించారు. హిమానీనదాలు కరగడానికి, క్లౌడ్బరస్ట్, ఇళ్లల్లో పగుళ్లకు కూడా ఇదే కారణమా..? అని అనుమానం వ్యక్తంచేశారు.
పార్లమెంట్లో 1978లో నిఘా పరికరం విషయాన్ని అప్పటి ప్రధాని మొరార్జీ దేశాయ్ అంగీకరించారని దూబే పేర్కొన్నారు. అమెరికా వార్తా సంస్థ న్యూయార్క్ టైమ్స్ ఇటీవల దీనిపై కథనాన్ని ప్రచురించిందని తెలిపారు. ఇప్పుడు మన భావితరాలను కాపాడుకునే సమయం ఆసన్నమైందని తన ఎక్స్ ఖాతాలో రాసుకొచ్చారు. ఈ అంశంపై 1978లో అమెరికా చట్టసభ సభ్యులు తమ ప్రభుత్వానికి రాసిన లేఖను ఆయన షేర్ చేశారు.
కొన్ని నెలల క్రితం కూడా దూబే ఈ విషయంపై కాంగ్రెస్ను విమర్శించారు. నందాదేవీ పర్వతంపై కనిపించకుండా పోయిన అమెరికా అణు పరికరానికి, ఉత్తర భారతంలో ఇటీవల ప్రకృతి వైపరీత్యాలకు ముడిపెడుతూ ఆయన విమర్శలు చేశారు. నెహ్రూ, ఇందిరతోపాటు రాహుల్ గాంధీ విదేశీ శక్తులకు లొంగిపోయి, దేశ ప్రయోజనాలను ఫణంగా పెట్టారని మండిపడ్డారు. వారి చర్యలు భావితరాలకు ప్రమాదకరంగా మారాయని ఆరోపించారు.
