Anant Singh expelled | ఎమ్మెల్యే అనంత్‌ సింగ్‌ను.. పార్టీ నుంచి బహిష్కరించిన జేడీ(యూ)

Anant Singh expelled | బీహార్ మాజీ సీఎం నితీశ్‌ కుమార్‌ నేతృత్వంలోని జనతా దళ్ (యునైటెడ్)కు చెందిన ఎమ్మెల్యే అనంత్‌ సింగ్‌పై ఆ పార్టీ చర్యలు చేపట్టింది. పార్టీ వ్యతిరేక కార్యకలాపాలకు పాల్పడినందుకు ఆయనను ఆరేళ్ల పాటు జేడీ(యూ) నుంచి బహిష్కరించారు.

పాట్నా: బీహార్ మాజీ సీఎం నితీశ్‌ కుమార్‌ నేతృత్వంలోని జనతా దళ్ (యునైటెడ్)కు చెందిన ఎమ్మెల్యే అనంత్‌ సింగ్‌పై ఆ పార్టీ చర్యలు చేపట్టింది. పార్టీ వ్యతిరేక కార్యకలాపాలకు పాల్పడినందుకు ఆయనను జేడీ(యూ) నుంచి బహిష్కరించారు. (Anant Singh expelled) మొకామా ఎమ్మెల్యే అనంత్ కుమార్ సింగ్, ఆయన భార్య, మాజీ ఎమ్మెల్యే నీలం దేవిలను ఆరేళ్ల పాటు పార్టీ నుంచి బహిష్కరించారు. వారిద్దరి ప్రాథమిక సభ్యత్వాన్ని తక్షణమే రద్దు చేస్తూ శనివారం ఉత్తర్వులు జారీ చేశారు. బీహార్ శాసన మండలి ఎన్నికలలో జేడీ(యూ) అభ్యర్థి నీరజ్ కుమార్‌కు వ్యతిరేకంగా అనంత్‌ కుమార్‌ సింగ్ ప్రచారం చేసిన నేపథ్యంలో ఆయనపై ఈ చర్య తీసుకున్నారు.

కాగా, పార్టీ నాయకత్వాన్ని ధిక్కరించిన ఎమ్మెల్యే అనంత్‌ కుమార్‌ సింగ్‌, పాట్నా గ్రాడ్యుయేట్స్ నియోజకవర్గంలో జన్ సూరజ్ అభ్యర్థి అనుజ్ సింగ్‌కు మద్దతు తెలిపారు. గత ఏడాది జరిగిన అసెంబ్లీ ఎన్నికల్లో నీరజ్ కుమార్ తనకు వ్యతిరేకంగా పనిచేశారని ఆయన ఆరోపించారు. ఆయనకు మద్దతు ఇవ్వాలన్న పార్టీ నిర్ణయాన్ని బహిరంగంగానే సవాల్‌ చేశారు.

అలాగే నితీశ్‌ కుమార్‌ కష్టాల్లో ఉన్నప్పుడు ఆయన కోసం తాను తొమ్మిది హత్యలు చేసినట్లు అనంత్‌ సింగ్‌ ఇటీవల సంచలన వ్యాఖ్యలు చేశారు. ఆ తర్వాత మాట మార్చిన ఆయన, ఆ నెపాన్ని లాలూపైకి నెట్టారు. బీహార్‌లోని ఎనిమిది శాసనమండలి స్థానాలకు శుక్రవారం ఓటింగ్ జరిగింది. ఆ మరునాడే ఎమ్మెల్యే అనంత్‌ సింగ్‌, ఆయన భార్యను పార్టీ నుంచి జేడీ(యూ) బహిష్కరించింది.