Arabinda Dhali: పార్లమెంట్, అసెంబ్లీ ఎన్నికలు ఒకేసారి జరగనున్న ఒడిశాలో అధికార బీజేడీకి షాక్ మీద షాక్ తగులుతోంది. ఆ పార్టీకి చెందిన నేతలు ఒక్కొక్కరుగా ప్రతిపక్ష బీజేపీలోకి జారుకుంటున్నారు. తాజాగా బీజేడీ సీనియర్ నేత, ఐదుసార్లు ఎమ్మెల్యే అయిన అరబింద ధాలి బీజేడీకి షాకిచ్చారు. శనివారం ఉదయం ఆయన పార్టీకి రాజీనామా చేశారు.
ప్రస్తుతం అరబింద ధాలి కోరాధా జిల్లాలోని జయదేవ్ నియోజకవర్గం నుంచి అసెంబ్లీకి ప్రాతినిధ్యం వహిస్తున్నారు. ధాలి తన రాజీనామా పత్రాన్ని బీజేడీ అధ్యక్షుడు, సీఎం నవీన్ పట్నాయక్కు ఈ-మెయిల్ ద్వారా పంపారు. అయితే ఆయన రాజీనామా చేయడానికి గల కారణాలను వెల్లడించలేదు. ధాలి మొదటిసారి 1992లో బీజేపీ టికెట్పై మల్కాక్గిరి ఉప ఎన్నికలో ఎమ్మెల్యేగా గెలుపొందారు.
ఆ తర్వాత రెండు పర్యాయాలు ఆ స్థానం నుంచే ఎమ్మెల్యేగా ధాలి విజయం సాధించారు. అనంతరం ఆయన బీజేడీలో చేరారు. 2009లో జయదేవ్ నియోజకవర్గం నుంచి విజయం సాధించారు. 2019లో కూడా ఇదే నియోజకవర్గంలో బీజేడీ టికెట్పై ఎమ్మెల్యేగా గెలుపొందారు. నవీన్ పట్నాయక్ కేబినెట్లో ధాలి రవాణా శాఖ మంత్రిగా పనిచేశారు.
గత నెల బీజేడీ నుంచి బహిష్కరణకు గురైన ఇద్దరు ఎమ్మెల్యేలు పాణిగ్రాహి, ప్రశాంత్ జగదేవ్ ప్రతిపక్ష బీజేపీలో చేరారు. రాష్ట్ర మాజీ మంత్రి దేబాసిస్ నాయక్ కూడా ఇటీవల బీజేడీ నుంచి బయటికి వచ్చారు. ఎన్నికల వేళ ఈ పరిణామాలు అధికార బీజేడీకి తలనొప్పిగా మారాయి.