ఏఐ విప్లవంతో క్యాన్సర్‌ ఇక గత చరిత్రే

కృత్రిమ మేధ (ఏఐ) అత్యంత వేగంగా అభివృద్ధి చెందుతుండటం వల్ల వైద్య రంగంలో విప్లవాత్మక మార్పులు వస్తాయని ఆంథ్రోపిక్‌ సీఈవో డారియో అమోడెయ్‌ చెప్పారు. రానున్న పదేండ్లలో క్యాన్సర్‌, అల్జీమర్స్‌, గుండె జబ్బులు, మానసిక అనారోగ్యం వంటి వ్యాధులు గత చరిత్రగా మారే అవకాశం ఉందన్నారు. ఏఐని సరైన రీతిలో వినియోగించుకోగలిగితే, వేల సంవత్సరాలుగా మానవాళిని వేధిస్తున్న సమస్యలకు పరిష్కారాలను కనుగొనవచ్చునని తెలిపారు. క్లాడ్‌ ఏఐ చాట్‌బాట్‌ను రూపొందించినది ఆంథ్రోపిక్‌ సంస్థ అనే విషయం తెలిసిందే.

• రానున్న పదేండ్లలో అల్జీమర్స్‌, గుండె జబ్బులకూ చికిత్సలు
• ఆంథ్రోపిక్‌ సీఈవో డారియో అమోడెయ్‌ కీలక వ్యాఖ్యలు
• పరిశోధనలు, పరీక్షలకు ప్రత్యామ్నాయం లేదన్న నిపుణులు

న్యూఢిల్లీ : కృత్రిమ మేధ (ఏఐ) అత్యంత వేగంగా అభివృద్ధి చెందుతుండటం వల్ల వైద్య రంగంలో విప్లవాత్మక మార్పులు వస్తాయని ఆంథ్రోపిక్‌ సీఈవో డారియో అమోడెయ్‌ చెప్పారు. రానున్న పదేండ్లలో క్యాన్సర్‌, అల్జీమర్స్‌, గుండె జబ్బులు, మానసిక అనారోగ్యం వంటి వ్యాధులు గత చరిత్రగా మారే అవకాశం ఉందన్నారు. ఏఐని సరైన రీతిలో వినియోగించుకోగలిగితే, వేల సంవత్సరాలుగా మానవాళిని వేధిస్తున్న సమస్యలకు పరిష్కారాలను కనుగొనవచ్చునని తెలిపారు. క్లాడ్‌ ఏఐ చాట్‌బాట్‌ను రూపొందించినది ఆంథ్రోపిక్‌ సంస్థ అనే విషయం తెలిసిందే.

ఇదిలావుండగా, ఏఐ సహాయంతో పదేండ్లలోనే అన్ని ప్రధాన వ్యాధులకు పరిష్కారాలు లభిస్తాయన్న అంచనాలపై ఔషధ పరిశ్రమలకు చెందిన పలువురు ప్రముఖులు సందేహాలు వ్యక్తం చేస్తున్నారు. వెర్టెక్స్‌ ఫార్మాస్యూటికల్స్‌ ఎగ్జిక్యూటివ్‌ చైర్మన్‌ జెఫ్‌ లీడెన్‌ మాట్లాడుతూ, దాదాపు 50 ఏఐ సంస్థల సాయంతో 10 వేల ఔషధ సమ్మేళనాలను పరిశీలించినప్పటికీ, వాటిలో ఏదీ స్వతంత్రంగా పని చేసే ఔషధాన్ని రూపొందించలేకపోయిందన్నారు. మరికొందరు ఔషధ రంగ నిపుణులు స్పందిస్తూ, ఒక ఔషధానికి ఉపయోగపడే అణువును ఏఐ గుర్తించినంత మాత్రాన అది మందుగా మారిపోదని చెప్పారు. ప్రయోగశాలల్లో పరీక్షలు, జంతువులపై అధ్యయనాలు, మానవులపై క్లినికల్‌ ట్రయల్స్‌, నియంత్రణ సంస్థల అనుమతులు తప్పనిసరి అని తెలిపారు.

సాధారణంగా ఒక ఔషధాన్ని అభివృద్ధి చేసి, ప్రజలకు అందుబాటులోకి తీసుకురావడానికి దాదాపు 12 ఏండ్లు పడుతుందని, ఈ ప్రక్రియలో ఎక్కువ సమయం పరీక్షలు, భద్రతా పరిశీలనలకే అవసరమవుతుందని పేర్కొన్నారు. ప్రస్తుత ఏఐ నమూనాలకు జీవశాస్త్రంలోని సంక్లిష్ట కారణ-ఫలిత సంబంధాలను పూర్తి స్థాయిలో అర్థం చేసుకునే సామర్థ్యం లేదని సంజ్ఞాన శాస్త్రవేత్త గ్యారీ మార్కస్‌, కార్డియాలజిస్ట్‌ ఎరిక్‌ టోపోల్‌ వంటి నిపుణులు తెలిపారు. ఏఐ రూపొందించిన ఔషధం పూర్తి స్థాయిలో వైద్య వినియోగంలోకి వచ్చిన దాఖలాలు ఇప్పటి వరకు లేవు. కొత్త చికిత్సలు సమర్థవంతమైనవని నిరూపించడానికి పరిశోధనలు, పరీక్షలకు ప్రత్యామ్నాయం లేదని నిపుణులు స్పష్టం చేస్తున్నారు.