అవినీతిపై నిరాహార దీక్ష చేస్తూ మృతి

అవినీతికి వ్యతిరేకంగా నాలుగు నెలలుగా నిరాహారదీక్ష చేస్తున్న ఓ సామాజిక కార్యకర్త తుదిశ్వాస విడిచారు.

మథుర, జూన్‌ 13: అవినీతికి వ్యతిరేకంగా నాలుగు నెలలుగా నిరాహారదీక్ష చేస్తున్న ఓ సామాజిక కార్యకర్త తుదిశ్వాస విడిచారు. ఉత్తరప్రదేశ్‌లోని మథుర జిల్లా దవాఖానలో మృతి చెందినట్టు అధికారులు గురువారం వెల్లడించారు. మాంట్‌ సబ్‌ డివిజనల్‌ మేజిస్ట్రేట్‌ (ఎస్‌డీఎం) ఆదేశ్‌కుమార్‌ వివరాల ప్రకారం.. జిల్లాలో అభివృద్ధి పనుల్లో అవినీతి జరిగిందని దేవకీనంద్‌శర్మ (66) గతంలో గ్రామీణాభివృద్ధి శాఖకు ఫిర్యాదు చేయగా విచారణ జరిపారు. కానీ, వారిచ్చిన నివేదికను శర్మ వ్యతిరేకించారు.

అవినీతికి వ్యతిరేకంగా ఫిబ్రవరి 12 నుంచి ఒక ఆలయం వెలుపల నిరాహార దీక్షకు కూర్చున్నారు. శర్మ ఆరోగ్యం క్షీణించడంతో దవాఖానకు తరలించగా గురువారం తుదిశ్వాస విడిచారు. ‘నేను సోమవారం శర్మను కలిశాను. అవినీతి విషయంపై ఉన్నతాధికారులకు వివరించినందున నిరాహార దీక్ష విరమించాలని అభ్యర్థించాను. కానీ, ఆయన రాతపూర్వక హామీ కోసం పట్టుబట్టారు. అలా రాసి ఇవ్వడం నా అధికార పరిధిలో లేదు అని చెప్పాను’ అని ఎస్‌డీఎం ఆదేశ్‌కుమార్‌ వివరించారు.