‘పెన్‌ప‌హాడ్ ఎస్ఐ గోపికృష్ణ నుండి ప్రాణ‌హాని’

సూర్యాపేట జిల్లా పెన్‌ప‌హాడ్ పోలీస్ స్టేషన్‌లో ఎస్ఐగా విధులు నిర్వహిస్తున్న కస్తాల గోపికృష్ణ నుండి తనకు ప్రాణహాని ఉన్నదని మండల పరిధిలోని న్యూ బంజారాహిల్స్ తండాకు చెందిన నునావత్ సుధాకర్ ఆరోపించాడు. త‌న‌కు ర‌క్ష‌ణ క‌ల్పించి ఎస్ఐపై చ‌ర్య‌లు తీసుకోవాల్సిందిగా కోరుతూ..

– నా భార్య‌తో అక్ర‌మ సంబంధం పెట్టుకుని కుటుంబానికి దూరం చేశాడు
– చంపుతామ‌ని బెదిరింపులు, ప‌లుమార్లు రెక్కి
– ర‌క్ష‌ణ క‌ల్పించాల‌ని ఎస్పీ న‌ర‌సింహ‌కు బాధితుడు నూనావ‌త్ సుధాక‌ర్ విన‌తి

పెన్‌ప‌హాడ్‌, జూన్ 20 : సూర్యాపేట జిల్లా పెన్‌ప‌హాడ్ పోలీస్ స్టేషన్‌లో ఎస్ఐగా విధులు నిర్వహిస్తున్న కస్తాల గోపికృష్ణ నుండి తనకు ప్రాణహాని ఉన్నదని మండల పరిధిలోని న్యూ బంజారాహిల్స్ తండాకు చెందిన నునావత్ సుధాకర్ ఆరోపించాడు. త‌న‌కు ర‌క్ష‌ణ క‌ల్పించి ఎస్ఐపై చ‌ర్య‌లు తీసుకోవాల్సిందిగా కోరుతూ శ‌నివారం జిల్లా ఎస్పీ కె.న‌ర‌సింహ‌కు లిఖిత పూర్వ‌కంగా ఫిర్యాదు చేశాడు. అనంత‌రం మీడియాతో ఆయ‌న మాట్లాడారు. గోపికృష్ణ, తాను ఏఆర్ కానిస్టేబుల్స్ బ్యాచ్‌మేట్స్ అని, హైదరాబాద్‌లో ఇరువురం ప‌క్క‌ప‌క్క క్వార్ట‌ర్స్‌లో ఉండేవార‌మ‌ని, ఆ స‌మ‌యంలో త‌న భార్య‌తో గోపికృష్ణ అక్ర‌మ సంబంధం పెట్టుకున్న‌ట్లు తెలిపాడు. ఈ క్ర‌మంలో గోపికృష్ణ పెన్‌ప‌హాడ్ ఎస్ఐగా రాగా త‌న భార్య‌ను సైతం పెన్‌ప‌హాడ్‌కు వ‌చ్చేలా చేసి భార్య‌, పిల్ల‌ల‌కు త‌న‌ను దూరం చేసిన‌ట్లు వెల్ల‌డించాడు.

అంతేకాకుండా త‌న‌కు ఎస్ఐ ఉద్యోగం వచ్చినా త‌ప్పుడు కేసులు పెట్టించి ఉద్యోగం పోవ‌డానికి కార‌కుడైన‌ట్లు తెలిపాడు. త‌న భార్య‌తోనూ కేసులు పెట్టించి వేధింపుల‌కు గురి చేస్తున్న‌ట్లు వాపోయాడు. అంతటితో ఆగకుండా తానెక్కడికి వెళ్లిన గుర్తు తెలియని వ్యక్తులు వెంబడిస్తున్నారని, వారు ఎస్ఐ గోపికృష్ణకు సంబంధించిన వారేన‌ని తెలిపాడు. త‌న ఫోన్ లొకేషన్, కాల్ డేటా తీసి మనోవేదనకు గురి చేస్తున్నాడని తెలిపాడు. పెన్‌ప‌హాడ్ ఎస్ఐ తన అనుచరులతో చంపాలని చూస్తున్నాడ‌ని, ఎప్పటికైనా తనను చంపుతార‌ని, తనకు ప్రాణ హాని ఉందని కావునా తనకు రక్షణ కల్పించాలని కోరుతూ ఎస్పీకి లిఖిత పూర్వ‌కంగా ఫిర్యాదు చేసిన‌ట్లు సుధాక‌ర్ వెల్ల‌డించాడు.