‘వారసత్వ పరిరక్షణకు సమగ్ర కార్యాచరణ’

ఉమ్మడి నల్లగొండ జిల్లాలో చారిత్రక కట్టడాలు, పురావస్తు ప్రదేశాలు, ప్రాచీన దేవాలయాలు, ప్రకృతి సంపద, జానపద కళలు, సాంస్కృతిక సంప్రదాయాల గుర్తింపు, పరిరక్షణ లక్ష్యంగా ఇండియన్ నేషనల్ ట్రస్ట్ ఫర్ ఆర్ట్ అండ్ కల్చరల్ హెరిటేజ్ (INTACH) ప‌ని చేస్తుంద‌ని ఇంటాక్ జాతీయ చైర్మన్ అశోక్ సింగ్ ఠాకూర్ తెలిపారు. బుధ‌వారం...

– ఇంటాక్ జాతీయ చైర్మన్ అశోక్ సింగ్ ఠాకూర్
– నల్లగొండలో ఇంటాక్ నూతన చాప్టర్ ప్రారంభం
– పానగల్లులో చారిత్రక వారసత్వ నడక
– జెండా ఊపి ప్రారంభించిన‌ జిల్లా కలెక్టర్ బి.చంద్రశేఖర్

నల్లగొండ, నవంబర్ 11 : ఉమ్మడి నల్లగొండ జిల్లాలో చారిత్రక కట్టడాలు, పురావస్తు ప్రదేశాలు, ప్రాచీన దేవాలయాలు, ప్రకృతి సంపద, జానపద కళలు, సాంస్కృతిక సంప్రదాయాల గుర్తింపు, పరిరక్షణ లక్ష్యంగా ఇండియన్ నేషనల్ ట్రస్ట్ ఫర్ ఆర్ట్ అండ్ కల్చరల్ హెరిటేజ్ (INTACH) ప‌ని చేస్తుంద‌ని ఇంటాక్ జాతీయ చైర్మన్ అశోక్ సింగ్ ఠాకూర్ తెలిపారు. బుధ‌వారం ఉదయం 9.30 గంటలకు పానగల్లులోని శ్రీ ఛాయా సోమేశ్వరస్వామి దేవాలయం నుండి శ్రీ పచ్చల సోమేశ్వరస్వామి దేవాలయం వరకు వారసత్వ నడక (Heritage Walk) నిర్వహించారు. జిల్లా కలెక్టర్ బి.చంద్రశేఖర్ మాట్లాడుతూ, నల్లగొండ చారిత్రక, సాంస్కృతిక వైభవానికి నిలయమని, ఈ సంపదను సంరక్షించడం అందరి బాధ్యతని పేర్కొన్నారు. ఇంటాక్ చేపట్టే వారసత్వ పరిరక్షణ, ప్రజా అవగాహన, పర్యాటకాభివృద్ధి కార్యక్రమాలకు జిల్లా యంత్రాంగం పూర్తి సహకారం అందిస్తుందని హామీ ఇచ్చారు. జాతీయ చైర్మన్ పర్యటన పట్ల కృతజ్ఞతలు తెలుపుతూ నూతన చాప్టర్ ప్రతినిధులను అభినందించారు.

ఇంటాక్ జాతీయ చైర్మన్ అశోక్ సింగ్ ఠాకూర్ మాట్లాడుతూ.. భారతీయ చరిత్ర, సంస్కృతి, సంప్రదాయాలను రాబోయే వందల సంవత్సరాల వరకు భావితరాలకు అందించడమే సంస్థ ప్రధాన ధ్యేయమన్నారు. చారిత్రక కట్టడాలతో పాటు మౌఖిక కథలు, కుటుంబ ఆచారాలు, జానపద కళలు, భాషలు, సామాజిక విలువలను డాక్యుమెంటేషన్ చేయాల్సిన అవసరాన్ని వివరించారు. శాతవాహనుల మాతృనామాలు, నూర్జహాన్ నాణేలు, షేర్ షా సూరి రూపాయి, సముద్రగుప్తుని అశ్వమేధ నాణేలను ప్రస్తావిస్తూ చారిత్రక ఆధారాల ప్రాముఖ్యతను తెలియజేశారు. అమ్మమ్మలు, నానమ్మల కథలు మౌఖిక వారసత్వానికి విలువైన ఆధారాలని, యువతకు సీనియర్ సభ్యులు మార్గదర్శకత్వం అందించాలని సూచించారు. దక్కన్ సాహిత్య వైభవాన్ని కొనియాడుతూ తెలంగాణ ప్రత్యేక సాంస్కృతిక గుర్తింపును ప్రశంసించారు.

తెలంగాణ వారసత్వ శాఖ డైరెక్టర్ ప్రొఫెసర్ అర్జున్ రావు కుతాడి మాట్లాడుతూ.. పానగల్లు ఛాయా సోమేశ్వరస్వామి దేవాలయ అభివృద్ధికి రూ.26 కోట్ల నిధులు మంజూరైనట్లు వెల్లడించారు. సహకరించిన మంత్రి కోమటిరెడ్డి వెంకట్ రెడ్డి, జిల్లా కలెక్టర్, రాష్ట్ర ప్రభుత్వానికి కృతజ్ఞతలు తెలిపారు. జిల్లా పురావస్తు ప్రదర్శనశాలను ఆధునిక డిజిటల్ సాంకేతికతతో అభివృద్ధి చేయాల్సిన అవసరాన్ని వివరించారు. ముదుమల్ మహాశిలాయుగ ప్రదేశం యునెస్కో తాత్కాలిక ప్రపంచ వారసత్వ జాబితాలో చేరేందుకు డెక్కన్ హెరిటేజ్ అకాడమీ ట్రస్ట్, వేదకుమార్ మణికొండ, పురావస్తు నిపుణులు చేసిన కృషిని అభినందించారు. అక్కడ మరిన్ని శాస్త్రీయ పరిశోధనలు చేపట్టనున్నట్లు తెలిపారు. ఇంటాక్ ఆవిర్భావంలో పుపుల్ జయకర్ పాత్రను గుర్తుచేస్తూ, డిప్యూటీ డైరెక్టర్ డాక్టర్ పి. నాగరాజు సేవలను ప్రశంసించారు.

ఈ కార్యక్రమంలో ఇంటాక్ జాతీయ పాలక మండలి, కార్యనిర్వాహక కమిటీ సభ్యుడు వేదకుమార్ మణికొండ, తెలంగాణ రాష్ట్ర చాప్టర్ల కన్వీనర్ సజ్జాద్ షాహిద్, నల్లగొండ చాప్టర్ కన్వీనర్ సముద్రాల ధనంజయ్య, సాహితీ, సాంస్కృతిక ప్రముఖుడు అంబటి వెంకన్న, కో-కన్వీనర్ డాక్టర్ ఆడెపు రమేష్ వందన, డాక్టర్ బి. సూర్యకుమార్, శ్రీరామోజు హరిగోపాల్, వేణు సంకోజి, కూరెళ్ల‌ శ్రీనివాస్, అంబటి వెంకన్న, జిగిని భీమయ్య, అమరేందర్ రావు, శ్యాంప్రసాద్ రెడ్డి, శ్యాంసుందర్, డాక్టర్ గట్టు శ్రీనివాస్, రామదాసు పెద్ది, గణేష్, భాస్కర్, రాజేందర్,రాఘవులు, రఘుపతి రెడ్డి, డాక్టర్ ముడుంబాయి పురుషోత్తమాచార్యులు, లింగయ్య యాదవ్, అచ్యుతరావు, రామదాసు, పెద్ది గణేష్, భాస్కర్, రాజేందర్, రామ్ రాజ్, వి. నరేందర్, పల్లె సతీష్, లింగమూర్తి, పవన్, గొల్ల నరేందర్, అంజన్, యునస్ ఫర్హాన్, జ్యోతి రెడ్డి తదితర ప్రముఖులతో పాటు డెక్కన్ హెరిటేజ్ అకాడమీ ట్రస్ట్, కొత్త తెలంగాణ చరిత్ర బృందం, జేబీఆర్ ఆర్కిటెక్చర్ కళాశాల ప్రతినిధులు, అధ్యాపకులు, విద్యార్థులు, ఇంటాక్ సభ్యులు పాల్గొన్నారు.