అమీన్‌పూర్‌ బల్దియాలో పార్కుల అభివృద్ధి

గ్రేటర్‌ శివారు ప్రాంతాల్లో ప్రణాళికాబద్ధ్దమైన పట్టణీకరణకు హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీసీ) అధిక ప్రాధాన్యతనిస్తోంది.

• లింగమయ్య పార్కు, తులసీ వనం లేక్‌, శంభునికుంట లేక్‌ల అభివృద్ధికి హెచ్‌ఎండీఏ నిధులు
• రూ.3.63 కోట్లతో ల్యాండ్‌ స్కేపింగ్‌ పనులు
• చేపట్టనున్న హెచ్‌ఎండీఏ అర్బన్‌ ఫారెస్ట్‌ విభాగం

సిటీబ్యూరో, మార్చి 17 (నమస్తే తెలంగాణ)/అమీన్‌పూర్‌: గ్రేటర్‌ శివారు ప్రాంతాల్లో ప్రణాళికాబద్ధ్దమైన పట్టణీకరణకు హైదరాబాద్‌ మెట్రోపాలిటన్‌ డెవలప్‌మెంట్‌ అథారిటీ (హెచ్‌ఎండీసీ) అధిక ప్రాధాన్యతనిస్తోంది. జీహెచ్‌ఎంసీ పరిధి దాటిన తర్వాత కొత్తగా అభివృద్ధి చెందుతున్న మునిసిపాలిటీలు, ఇతర కార్పొరేషన్లలో అవసరమైన అభివృద్ధి పనుల కోసం హెచ్‌ఎండీఏ ప్రత్యేకంగా నిధులు కేటాయించడంతో పాటు ఆయా పనులను స్వయంగా చేపడుతోంది. తెలంగాణ రాష్ట్రం ఏర్పాటైన తర్వాత హైదరాబాద్‌ మహానగరం ఎవరూ ఊహించని విధంగా ఔటర్‌ రింగురోడ్డు దాటి విస్తరిస్తోంది.

ఈ నేపథ్యంలో పట్టణీకరణకు అనుగుణంగా పర్యావరణ సమతుల్యత దెబ్బతినకుండా జీవ వైవిధ్యానికి ప్రాధానిస్తూ హైదరాబాద్‌ మెట్రోపాలిటన్‌ రీజియన్‌ పరిధిలో పచ్చదనం పెంపొందించేందుకు చెరువుల సుందరీకరణ, పార్కుల నిర్మాణం వంటి పనులు హెచ్‌ఎండీఏ చేపడుతోంది. తాజాగా గ్రేటర్‌ శివారులోని అమీన్‌పూర్‌ మునిసిపాలిటీలో 2 చోట్ల ఉన్న చెరువులు, మరో 2 పార్కుల అభివృద్ధికి మొత్తం రూ.3.36 కోట్ల నిధులతో ల్యాండ్‌ స్కేపింగ్‌ పనులను హెచ్‌ఎండీఏ అర్బన్‌ ఫారెస్ట్రీ విభాగం చేపట్టనున్నది.

హెచ్‌ఎండీఏ పరిధిలో ఉన్న లేక్‌ ప్రొటెక్షన్‌ కమిటీ చెరువుల సరిహద్దులను నిర్ణయించి వాటి పరిరక్షణకు చర్యలు చేపడుతుండగా, ఆయా చెరువులన్నీ స్థానికులకు ఆహ్లాదకరంగా మార్చేందుకు వాటిని అందమైన పచ్చిక బయళ్లతో తీర్చిదిద్దనున్నారు. పెద్దమొత్తంలో రకరకాల మొక్కలు నాటుతూ పచ్చదనాన్ని పెంపొందించేలా హెచ్‌ఎండీఏ కృషిచేస్తోంది.