Cotton crop | వర్షాభావంతో పత్తి పంటకు తీవ్ర నష్టం : సక్రియ నాయక్

వర్షాభావ పరిస్థితులతో పంటలు ఎండిపోతుండటంతో రైతులు తీవ్ర ఆందోళనకు గురవుతున్నారు.

ఊట్కూర్, నవంబర్ 12: వర్షాభావ పరిస్థితులతో పంటలు ఎండిపోతుండటంతో రైతులు తీవ్ర ఆందోళనకు గురవుతున్నారు. నారాయణపేట జిల్లా ఊట్కూర్ మండలం మల్లేపల్లి గ్రామ శివారులో ఎండిపోయిన పత్తి, వరి, కంది పంటలను జిల్లా వ్యవసాయ అధికారి సక్రియ నాయక్ గురువారం క్షేత్రస్థాయిలో పరిశీలించారు. పంటల పరిస్థితిని పరిశీలించి రైతులను వివరాలు అడిగి తెలుసుకున్నారు. ఎండిపోయిన పంటలకు సంబంధించిన వివరాలను ఆన్‌లైన్‌లో నమోదు చేయాలని, పంట నష్టం సర్వే, గణన, అంచనా ప్రక్రియను వీలైనంత త్వరగా పూర్తి చేయాలని సంబంధిత వ్యవసాయ అధికారులను ఆదేశించారు.

ఈ సందర్భంగా గ్రామ సర్పంచ్ కతలప్ప మాట్లాడుతూ గ్రామంలో సుమారు 95 శాతం మంది రైతులు పత్తి పంటనే సాగు చేశారని, వర్షాలు సకాలంలో కురవకపోవడంతో పత్తి పంట తీవ్రంగా దెబ్బతిన్నదని తెలిపారు. పెట్టుబడులు పెట్టి పంటలను సాగు చేసిన రైతులకు ఆశించిన దిగుబడి వచ్చే పరిస్థితి లేదని ఆవేదన వ్యక్తం చేశారు. పంట నష్టాన్ని సమగ్రంగా అంచనా వేసి బాధిత రైతులకు న్యాయం జరిగేలా చూడాలని కోరారు. పంట నష్టం వివరాల నమోదు, సర్వే ప్రక్రియలో ఎలాంటి జాప్యం జరగకుండా చర్యలు తీసుకోవాలని జిల్లా వ్యవసాయ అధికారి సూచించారు. కార్యక్రమంలో రైతులు లక్ష్మణ్, రాము, మండల వ్యవసాయ అధికారి గణేష్ రెడ్డి, ఏఈఓ రజిత తదితరులు పాల్గొన్నారు.