సందువోకుండ ముగ్గులేసి

సంకురాతిరి పండగంటే మా తెలంగాణల సకినాల పండగే& కంచుడువెట్టని కడపే ఉండది...

January 14, 2024 / 02:10 AM IST

సంకురాతిరి పండగంటే మా తెలంగాణల సకినాల పండగే&
కంచుడువెట్టని కడపే ఉండది…
ఊళ్లె రోజుకో ఇల్లని వంతు వెట్టుకొని సీకట్లనే బియ్యం నానవెడితే…
తెల్లారంగ గిర్ని కాడ నిలవడి నిలవడి పిండి పట్టిచ్చుకచ్చేటోల్లు…
అమ్మమ్మ మా వాడకున్న నలుగుర్ని సకినాలు సుట్ట రమ్మని…
ఉతికిన రెండు పాత శెద్దర్లు పర్శి నడివిట్ల గౌరమ్మను వెడితే…
అందరు ఒక్కతీరు సకినాలు సుడుదురు…
తాతకి సకినాలు దంగయని మెత్తగ బెల్లపరిసెలు చేసి సాటుకు తనబ్బిల ఓరగవెట్టేది&
పండుగకు రెండొద్దుల ముందుగాల్నే ఆకిట్ల ముగ్గేయ బియ్యప్పిండి పట్టిచ్చి…
బోగినాడు మబ్బుల మూడింటికే లేశి కొట్టంల పెండ తెచ్చి గుంజపొంట పెట్టేది..
ఆకిలంత ఊడ్చల్లి సందువోకుండా గిర్క వట్టి ముగ్గేసుకత్తే…
అవ్వగారింటికచ్చిన ఆడిబిడ్డ పీటేసి గొబ్బెమ్మలు చేసి పసుపు కుంకుమ పుదిచ్చేది..
పెరట్ల గర్కపోసలు, బంతి పూలు కోస్కచ్చి…
సోలల వడ్లు, రేగువండ్లు, మక్కిత్తులు, జొన్నలు, చిక్కులు, కలిపి…
ముగ్గుముగ్గుల గౌరమ్మలు పెట్టీ
నవధాన్యాలు పోసుకద్దురు..
సెవ్వుల్ల నూనెబొట్టేసుకొని తలకువోస్కొని…
అర్రలికి ఏళ్ల ముగ్గేసి ఇంటి దేవుడికి దీపం పెట్టీ..
పొయ్యికాడ ఎచ్చగా కూకొని
పులుగన్నం, పచ్చిపులుసు అండుతాంటే…
సన్నాయి సప్పుల్లతో గంగిరెద్దు బసవన్నలచ్చి పందిరికింద ఆటలాడితే…
మనువలు, మనవరాండ్లు ఎగురుకుంట తాత సుట్టు సంబురంగ తిరుగుదురు…
పట్నం నుండచ్చిన పాలోల్లందరు ఒకరింటికి ఒకలువోయి కట్టసుఖాలు మాట్లాడుకునుడే..
మా సంకురాతిరి పండుగ…
పండుగంటే కొత్త బట్టలేసుకునుడే కాదు..
కండ్లనీళ్లు తీసుడు…
బిడ్డ బస్సెక్కేదాకా కడుపులవెట్టుకొని సూసుకొనుడు…
సకినాల సంచిచ్చి సాగనంపుడు…