విప్లవధార అగ్నిధార జేజేలు

అందరు మెట్లెక్కి సుఖపడాలనుకుంటారు పూలపరిమళ విలాసాలనే అనుభవిస్తుంటారు

అందరు మెట్లెక్కి సుఖపడాలనుకుంటారు
పూలపరిమళ విలాసాలనే అనుభవిస్తుంటారు కానీ
పీడితుల కలంగా అవకాశాలను విసిరేసి
ప్రజాకంటక పీడకులని ఎదిరించిన సాహసి
నవాబుల నిలువెత్తు రాచరికాల దాస్యాలు
రజ్వీ రాబందులు దేశ్‌ముఖ్‌ దొరల అకృత్యాలు
దిక్కులదిరేలా పర్జన్యమై గర్జించాడు
నా తెలంగాణ కోటి రత్నాల వీణై విప్లవించాడు

తెలంగాణ కోసం శవమైనా సరేనని
ఓరే పిశాచమా! నీ రాచరికం సమాధేనని సవాలిసిరాడు సిమెంట్‌ కలిపిన బువ్వతో
బందీఖానాలో హింసలు
హత్యల పన్నాగాలెన్నైనా
కవన పయోనిదికి మరణం లేదు
చీకటి కారాగారంలో
కదులనియ్యని ఉక్కు సంకెళ్లు
బొగ్గే సుద్దముక్కై జైలుగోడల
నిండా నల్లనల్లని అక్షరాలు
జై తెలంగాణ అంటూ
భాస్వరమై మండిన ధిక్కారాస్ర్తాలు
నిజాం నిరంకుశ గుండెల్లో పెనుమంటలు

తెలుగుకు తావే లేదన్న కత్తుల బోనులో
తెలంగాణ రచయితల సంఘం తొలి కెరటమై
ఊరు వాడలు ఉత్తేజ కవిత్వమై
తెలుగు వెలుగును దేశానికి ఎలుగెత్తి
బహుభాషా సాంస్కృతిక సేవలై ప్రవహించాడు
శతకాలు రుబాయీలు పద్యాలు నాటికలు
వ్యాసాలు పీఠికలు గేయాలు
నేలంతా మేలుకొలుపు
గజల్‌ ప్రక్రియలో తొలి పాదమై
అనుసృజనలో వెల్లివిరిసిన తేట తెలుగుదనం

-వనపట్ల సుబ్బయ్య
94927 65358