వెలుగు పాట

ఏడాది అయినా మనసు ముక్కలు ముక్కలుగానే ఉన్నది

ఏడాది అయినా
మనసు ముక్కలు ముక్కలుగానే ఉన్నది
గోడలన్ని నల్లటి మస్కలు నీ పాట మాటినక
వెలుగు పాటను పోగొట్టుకున్నట్టున్నది
వాకిట్లో పూలచెట్టు తలవాల్చే ఉన్నది!

అమాంతం
జీవనది ఒక్కసారిగా ఆగిపోయినట్టుంది
నీ సవ్వడి లేక కాలం దిగులేసుకున్నది

ఆకాశం నుంచి చినుకుల్లా
జన మైదానంలో ఆ రాగాలు
గోరింటాకు పూసినట్టే
గల గల గర్జనకు
నేల మీద జనమే కాదు
చెరువులో చేపలు కోలాటమేసేవి
జ్వరం పట్టినవాడు కూడా
జెజ్జనకరే జెన్‌ దూలా ఆడేది

సెలయేరులా రాగం ఎంత మధురం
పాటల పేగు మెడకేసుకొని పుట్టినట్టు
కణ కణ కంచు కంఠం గాంభీర్యంగా
నెమలి పింఛం విప్పినట్టు గొప్ప ఊపిరి
రాళ్లకు రెక్కలను మొలిపించే పాటలు
గుండెలను వేడెక్కించే గీతాలు
గడ్డిపోసలు నిటారుగా నిలబడే పౌరుషాలు
ఒక్కొక్క పాట ఒక్కో లడాయే!

ఆధిపత్యాలనే కాదు
కరుణ లేని శివుడునీ కడిగేసిన ధీరత్వం
ఆలోచనలను మండించే సామాజిక స్ఫూర్తి
అనేక సమభావనల మూర్తిమత్వం
వెన్నెల పొడుపులా
తెలంగాణ సాకారానికి
నిప్పుల నెగళ్ల పాటలు!

కరెంట్‌ లేకున్నా సర్దుకుంటాం
విత్తనం మొలువకపోయినా బిగపట్టుకుంటాం
నీ ధ్వని వినకపోతే ఉండలేకపోతున్నం
పాలమూరు పాట తీపిని చూసి
కళ్లు మండినట్టున్నవి
ఎదుగుతున్నప్పుడే తుంచటం ఎంత విషాదం

మిత్రమా..
సముద్రమంతా దుఃఖమైనా విప్లవిస్తాం
మీ ఆశయ సిద్ధికి కవిత్వమై ప్రవహిస్తాం..

వనపట్ల సుబ్బయ్య
94927 65358