శబ్ద రత్నాకరం !!

మాట్లాడే తీరుతోనే గజారోహణం గండపెండేరం నాల్క పై నోటికే ఎన్నెన్ని గ్రంథాలో కనబడకుంటే ఏమిటి! పిలిస్తే పలుకుతాయి సముద్రుడు రత్నగర్భుడైతే నాల్క శబ్దరత్నాకరం

తల్లి కడుపు నుంచి విశ్వవిద్యాలయంలోకి వచ్చిన
శిశువు నాల్కభాష మొదట శ్రీకారంగా
స్వీకారంగా ఏడ్పే!
ఎవరూ నేర్పని భాష
నేర్వకనే వచ్చిన ప్రపంచ భాష!
ఏడ్పు ఎక్కడైనా ఒకటే !
ఏ వ్యాకరణం లేదు !
మాటలు రాని వయస్సు నుంచి
మాటలు నేర్చి మర్లపడేంత వరకూ
నాల్కకు ఎప్పుడూ జాలువారే అభ్యాసమే

అందరూ అంటారు గాని తలలో నాల్క ఎక్కడిది !
నోట్లోనే నాల్క నానుతుంది
ఎప్పటికప్పుడూ నాల్క పై ఆశువుగా
ఎన్ని పదాలు ఊరుతాయో !
నిఘంటువు సైతం వెతుక్కుని బరువయ్యేంత !
తెలిసేలా ముద్రింపబడి లేవు గానీ
నాల్క పై ఒక్కో బుడిపె ఒక మహా గ్రంథమే
అందుకే నవరస రుచుల కావ్య వర్ణనలు

నాల్కకు ఎందరెందరు గురువులో !
అమ్మ నుంచి గణించి
మరీ లెక్క పెట్టి గుణించేంతగా గురువులు

నీదేం గొప్ప !
ఇంటర్వ్యూలో నీ నాల్కే కదా సమయానికి
తడబడకుండా తండ్లాడి జవాబులిచ్చేది
అందుకే ప్రత్యేకంగా నాల్కను తీపి చేసి సన్మానిస్తాం!
నాల్క ఇంకేం అడగదు ! సంతోషం లాలాజలం
నాల్క మహాజ్ఞాని పొగడటం తెలుసు..శపించటం తెలుసు

మాట్లాడే తీరుతోనే గజారోహణం గండపెండేరం
నాల్క పై నోటికే ఎన్నెన్ని గ్రంథాలో
కనబడకుంటే ఏమిటి!
పిలిస్తే పలుకుతాయి
సముద్రుడు రత్నగర్భుడైతే
నాల్క శబ్దరత్నాకరం !

కందాళై , రాఘవాచార్య
87905 93638