పేరు లేని రంగు

అసలీ రంగులెక్కడివి? ముట్టుకోకుండానే చేతిలో పుట్టి కంటిని మరకలతో బాధపెడుతూ ఎదురు తిరుగుతున్నాయి

అసలీ రంగులెక్కడివి?

ముట్టుకోకుండానే చేతిలో పుట్టి
కంటిని మరకలతో బాధపెడుతూ
ఎదురు తిరుగుతున్నాయి

ఏ పేరుతో పిలిచి
పరిచయం చేసుకొని
మురిసిపోతూ
పులుముకోవాలి ముఖానికి?

మనసుకంటని
ఏ రంగును ఐనా ఎలా ప్రేమించాలి?
ఏమని పొగుడుకొని పొంగిపోతూ
సంతోషపడాలి?

కంటిని ఓ రంగు ఆశపెడితే
మనసుపై మరో రంగు దాడి
మాటకు ముందే మరకవుతుంటే
మాట తర్వాత మచ్చ పడుతుంటే

ఏ రంగు మంచిది?
పేరే లేని రంగు ఒకటుంటే బాగుండు..
మరకపడ్డా బాధనేది ఉండదు.
మెరుపులా కురిసినా పట్టింపుండదు..

– చందలూరి నారాయణరావు 97044 37247