అరుగు

అక్కడెన్నో ముచ్చట్లు మురిపెంగా ముచ్చటించబడతాయి వర్ణ, వర్గ, వయో, లింగ, కుల మత భేదాలకతీతంగా ఆప్యాయతలు కురిపించబడతాయి సంసార బాధ్యతలు బరువులు చర్చించబడతాయి వంటల్లో కొత్త రుచులెన్నో ఆస్వాదించబడతాయి

అక్కడెన్నో ముచ్చట్లు మురిపెంగా
ముచ్చటించబడతాయి
వర్ణ, వర్గ, వయో, లింగ, కుల
మత భేదాలకతీతంగా
ఆప్యాయతలు కురిపించబడతాయి
సంసార బాధ్యతలు బరువులు చర్చించబడతాయి
వంటల్లో కొత్త రుచులెన్నో ఆస్వాదించబడతాయి
మధుర జ్ఞాపకాలెన్నో నెమరేసుకోబడతాయి
విడిపోయిన జీవితాలను కలపడానికి ఆరాటపడతాయి
ఆరోగ్య సూత్రాలు చిట్కాలు పంచుకోబడతాయి
అన్యాయాన్ని, అధర్మాన్ని ధైర్యంగా
ఎదిరించడం నేర్పబడతాయి
భావి జీవితాలకు మార్గదర్శకాలు
ఆవిష్కరించబడతాయి
దిక్కుతోచని వారికి దిశానిర్దేశాలు చేయబడతాయి
నూరు అబద్ధాలాడైనా పెళ్లి చేయాలనే మాటకు
ఊపిర్లు ఊదబడతాయి
చందమామ కథలు ఎన్నో పురుడు పోసుకుంటాయి
అనుభవాన్ని రంగరించి ఉగ్గుపాలతో
ఔపోసన పట్టబడుతుంది
సంసారాలన్ని చక్కదిద్దే చిట్కాలు వివరించబడతాయి
కల్లాకపటం లేని కబుర్లన్నీ ఆహ్లాదంగా
కలబోసుకోబడతాయి
ఏ చదువూ లేకుండానే
జీవిత పాఠాలన్నీ నేర్పబడతాయి
తలనెరిసిన తలలన్నీ ఎప్పుడెప్పుడక్కడకు
చేరుకుందామని తహతహలాడుతాయి
ప్రేమానురాగాలు కుప్పబోసి అందరికీ పంచబడతాయి
చెల్లాచెదురైన మమతానుబంధాలన్నీ
అందంగా అల్లబడతాయి
ఏ డిగ్రీ నేర్పని పాఠాలెన్నో నేర్పబడతాయి
ఇంతవరకెవరూ చేయని
పరిశోధనలెన్నో చేయబడతాయి
సుతిమెత్తని సున్నిత బంధాలెన్నింటికో
వారధి వేయబడుతుంది
అడ్డుగోడలెన్నో ఛేదించి
వంతెనలెన్నో నిర్మించబడతాయి
భావితరాలకు బంధాల ఆత్మీయతలు తెలిపే
వేదికలుగా తీర్చిదిద్దబడతాయి
సమస్యలన్నీ చర్చించబడతాయి
పరిష్కారాలన్నీ సూచించబడతాయి
నవరసాలను పండించి, అమృతం ఇచ్చి
గరళం మింగిన గౌరీశునిలా ఆ వేదిక ఒక్కోసారి
గంభీరంగా ఉండిపోతుంది.
ప్రస్తుతం కనుమరుగవుతున్న ఆ వేదిక
భావితరాలకు అనుభవాల సారాలతో
దిక్కు సూచించే సుమమాలిక

-నామని సుజనాదేవి , 77993 05575