జాతి నిరీక్షిస్తోంది

నిరీక్షిస్తోంది జాతి నేత ఆగమనానికి వేచి చూస్తోంది జనత వేగు చుక్క ఉదయానికి కమ్మిన మబ్బులు తొలగి కాంతి పుంజాల వెలుగు గగన సీమనాసాంతం ఆవిష్కృతం కావాలని..

నిరీక్షిస్తోంది జాతి నేత ఆగమనానికి
వేచి చూస్తోంది జనత వేగు చుక్క ఉదయానికి
కమ్మిన మబ్బులు తొలగి కాంతి పుంజాల వెలుగు
గగన సీమనాసాంతం ఆవిష్కృతం కావాలని..

మత మౌఢ్యం మరుగునపడి
కుల కుంచితం వెలకిలబడి
సమ సమాజం శిరసెత్తి
గర్విస్తూ నిలువబడే
శుభ తరుణం రావాలని..

కార్మికులు, కర్షకులు, వ్యాపారుల
గుండె నిండా సంతోషం
ఉరకలెత్తు నవ యువతకు
ఉపాధుల సౌలభ్యం
పండుగలా పల్లె సీమ
నిండుగ వర్ధిల్లాలని
గ్రామ రాజ్య సంస్థాపన
కనుల ముందు నిలవాలని…

ఆక్రందనలన్నీ ఆఖరై పోవాలని..
ఆవేదనలన్నీ ఆవిరై పోవాలని..
బాపూజీ కరమ్‌ చంద్‌… బాపూ కేసీఆర్‌
బాట వొకటె.. మాటలొకటె..

ఆశయాలు, ఆదర్శాలు అలుపెరుగని ఉద్యమాలు
అవిశ్రాంత పోరాటం.. అంతులేని ఆరాటం
సత్యాహింసల పైన సాటిలేని నమ్మకం
సర్వ మత సమానత్వం, శాంతి స్థాపనే లక్ష్యం

నాడు కొల్లాయి గట్టుకున్న కొద్ది పాటి దేహానికి
కొండంత మనో బలం
పిలుపిస్తే పలికింది ఆసేతు హిమాచలం
నేడు బక్క పలుచని కాయం చెక్కు చెదరని ధైర్యం
ఒక్క పిడికిలెత్తితే ముక్కోటి స్పందన..
సబ్బండ వర్గాలను నిబ్బరంగ కలిపిన
ఊరు, వాడ కదిలించిన ఉద్యమాల ఉప్పెన
తెలంగాణ సాధన విజయానికి కేతన..

స్వాతంత్య్ర సముపార్జన ఆ బాపూ ఘన విజయం
స్వరాష్ట్ర ఆవిర్భావం ఈ బాపూ దిగ్విజయం
బాపూజీ కన్న కలలు సాకారం చేయాలని
మన బాపూ సదాశయం
ఆ శుభ తరుణం రావాలని..
భరతావని నిరంతరం ప్రతీక్షిస్తోంది నిజం..!

-మంత్రి శ్రీదేవి