శిశువుకు కడుపులో ఉన్నప్పుడే
తల్లి స్వరాన్ని గుర్తుంచుకునుడు
నిరంతరంగా మొదటి విద్య!
అమ్మ తన కోసం ప్రసవ వేదనతో
మెలికల అరుపులుగా తండ్లాడుతుంటే
పుట్టకముందే తల్లిని హింసిస్తున్నానని
కడుపులో కన్నీళ్ల పర్యంతం శిశువు!
ఉమ్మ నీరులో కలిసిపోయిన పసి కన్నీటిని
ఎలా గుర్తించగలం
బహుశా నొప్పుల తల్లికి శిశువు నునువెచ్చని
బాష్ప స్పర్శ కడుపంతగా తెలిసే ఉంటుంది
కొన్ని గంటలకు మాతృమూర్తి విశాలమైన
ఒడిలోకి వచ్చాకా
తల్లి ఆనందాన్ని చూస్తూ కడుపు నిండా
క్షీర ధారాపాతాల బలంతో కేరింతలుగా శిశువు!
పురిటి గదిలో శిశువుకు మొదటి పండుగ!
అమ్మను ఎప్పటికీ ఇలాగే సంతోషంగా
ఉంచుతానని శిశువు పిడికిలి
బిగించి ప్రతిజ్ఞ చేస్తున్నాడు!
ఇంకా నాభి తెగి ఒక్క పేరైనా పెట్టుకోలే
తల్లిపై ఎంత ఎరుక!
భవిష్యత్తులో శిశువు ఇలాగే
పిడికిలి బిగిస్తూ ఎన్ని ప్రతిజ్ఞలు చేస్తాడో!
– కందాళై రాఘవాచార్య 87905 93638