Female Employees | ఈ రోజుల్లో అతివలు అన్ని రంగాల్లోనూ ముందుంటున్నారు. అవకాశాలను దొరకబుచ్చుకుంటున్నారు. పని ప్రదేశంలో ఎదురయ్యే అసమానతలను ధైర్యంగా ఎదుర్కొంటున్నారు. అయితే, ఎంతకష్టపడినా శ్రమకు తగ్గ వేతనం పొందడం, ప్రమోషన్ల విషయంలో ఇప్పటికీ వివక్ష ఎదురవుతున్నదని కొందరి అపోహ! కానీ, అన్నిచోట్లా ఇలాంటి పరిస్థితులు లేవని కొన్ని పరిశోధనలు తేటతెల్లం చేస్తున్నాయి. ఓ అంతర్జాతీయ సంస్థ అధ్యయనంలో వెలుగు చూసిన విషయాలు ఇవి..
అపోహ: పని ప్రదేశాల్లో స్త్రీలకు విశ్వాసం తక్కువ
వాస్తవం: ఒకప్పటితో పోలిస్తే ఇప్పుడీ పరిస్థితి లేదు. మహిళా ఉద్యోగుల సంఖ్య నానాటికీ పెరుగుతున్నది. టీమ్ లీడర్లుగానూ రాణిస్తున్నారు. సకాలంలో పని పూర్తి చేయడంలో పురుషుల కన్నా మహిళలు ఒక అడుగు ముందే ఉంటున్నారు. పట్టుదలతోపాటు తెలివితేటల్లోనూ సత్తా చాటుతున్నారు.
అపోహ: పురుషులతో సమానంగా వేతనం ఉండదు
వాస్తవం: తన శక్తి సామర్థ్యాలపై పూర్తి నమ్మకం ఉన్న మహిళలు.. వర్క్ప్లేస్లో అసమానతలను ఎండగట్టడంలో ముందుంటున్నారు. వేతనాల విషయంలో వివక్ష చూపిస్తే.. తమ గొంతును గట్టిగానే వినిపిస్తున్నారు. పనివేళల నుంచి వేతనాల వరకు రాజీపడే ప్రసక్తే లేదంటున్నారు. అవసరమైతే పోరాడి మరీ తమ హక్కులను సాధించుకుంటున్నారు.
అపోహ: ఉన్నత స్థానానికి చేరుకోలేరు
వాస్తవం: మహిళా ఉద్యోగుల పురోగతి మగవారి కంటే నెమ్మదిగా ఉంటుందని కొందరి నమ్మిక. కానీ, ఈ తరం అతివలకు సామర్థ్యానికి తగ్గ స్థానం లభిస్తున్నది. ఇప్పటికే ఎందరో మహిళలు ఈ విషయాన్ని రుజువు చేశారు. క్యాంపస్ ప్లేస్మెంట్లోనూ తమ ప్రతిభతో రికార్డు ప్యాకేజీలు అందుకున్న యువతులు కోకొల్లలు. ప్రతిభ ఉన్నవారిని ఆపడం అన్నివేళలా సాధ్యం కాదు.