నెయిల్ ఆర్ట్.. గోళ్ల అలంకరణ కోసమే పుట్టుకొచ్చిన కళ. చేతి వేళ్లనే కాదు, కాలిగోళ్లనూ దీంతో అందంగా ముస్తాబు చేసుకోవచ్చు. ఇందుకు సృజన, కళ, అంతకు మించి ఓపిక ఉండాలి. ఇవేవీ లేకున్నా గోళ్లను అందంగా అలంకరించుకునేందుకు సాయపడతాయి ‘స్టోన్ స్టడెడ్ టో నెయిల్స్’. రాళ్లను పొదిగిన గోళ్లను కాలికి అతికించుకోవడం ఇందులోని విశేషం.
నఖశిఖ పర్యంతం.. అన్నట్టు అలంకరణ అంతటా ముఖ్యమే. అందుకే జుట్టును ముచ్చటగా ముడివేసినట్టే, కాలి గోళ్లనూ కళగా అలంకరించుకుంటారు. పసుపు పాదాలకు పారాణి రాసి సంప్రదాయాన్ని చూపిన చోటే ఫేక్ నెయిల్స్ అతికించుకుని ఫ్యాషన్నూ ప్రదర్శిస్తారు. పాదాలకు పొందికగా పెడిక్యూర్చేసి, గోళ్లకు నెయిల్ ఆర్ట్ వేసినట్టు కనిపించేలా.. నిజమైన గోళ్లను పోలినట్టు ఉంటున్నాయి ఫేక్ నెయిల్స్. వాటికి రకరకాల రాళ్లు, కుందన్లు అలంకరించడం కొత్త ట్రెండ్. ఈ స్టోన్ స్టడెడ్ టో నెయిల్స్.. తెలుపుతో పాటు బంగారు రంగులోనూ, మల్టీ కలర్ రాళ్లు, కుందన్లతోనూ లభిస్తున్నాయి.
రంగు రంగుల నెయిల్ పాలిష్ల మీద విభిన్న ఆకృతుల్లో ఈ స్టోన్ నెయిల్స్ను తయారు చేస్తున్నారు. కొన్నిటిలో రాళ్లకు తోడు నెయిల్ ఆర్ట్ వేసీ ముస్తాబు చేస్తున్నారు. వివిధ వేడుకలప్పుడు ధరించడానికి బాగుంటాయి. మనం చేయాల్సిందల్లా ఫేక్ నెయిల్స్తో పాటు వచ్చే గ్లూతో వీటిని అతికించుకోవడమే. నెయిల్ ఆర్ట్ రాకపోయినా, నెయిల్ పాలిష్ వేసుకోవడం తెలియకపోయినా పార్టీలో మెరిసిపోవచ్చు!