Nikah Terinsip | సోషల్ మీడియా వాడకం పెరిగిన తర్వాత చాలామంది రాత్రికి రాత్రే పాపులర్ అవుతున్నారు. అదే సమయంలో దాని కారణంగా ఇబ్బందులను ఎదుర్కొంటున్న వాళ్లూ ఉంటున్నారు. సరిగ్గా అలాంటి పరిస్థితే మలేషియా అందాల తార వీరూ నికాహ్ టెరిన్సిప్కు ఎదురైంది. సరదాగా తీసుకున్న ఒక వీడియో ఆమెకు దక్కిన అందాల తార కిరీటాన్ని దూరం చేసింది. వీరూ నికాహ్.. 2023లో మలేషియాలో అందాల కిరీటాన్ని కైవసం చేసుకుంది.
అయితే, ఆమెకు ఆ ఆనందం ఎక్కువ కాలం నిలవలేదు. సోషల్ మీడియాలో చాలా యాక్టివ్గా ఉంటుంది. తరచూ సరదా వీడియోలు పోస్టు చేస్తుంటుంది. ఇటీవల కుటుంబంతో కలిసి థాయ్లాండ్ విహారానికి వెళ్లింది. అక్కడ చిట్టిపొట్టి దుస్తులు ధరించి సరదాగా నృత్యం చేసింది. ఆ డ్యాన్స్ వీడియోను తన సోషల్ మీడియా అకౌంట్లో పోస్టు చేసింది నికాహ్. ఆ వీడియో అసభ్యకరంగా ఉందంటూ నెటిజన్ల నుంచి తీవ్ర వ్యతిరేకత వ్యక్తమైంది. దీంతో ఆమెకు కిరీటాన్ని ప్రదానం చేసిన సంస్థ.. ‘నికాహ్ తీరుపై చాలామంది ఫిర్యాదు చేశారు.
సరదా అయితే మాత్రం.. సోషల్ మీడియాలో పోస్టు చేసేముందు తానో సెలెబ్రిటీ అనే విషయాన్ని గుర్తుంచుకోవాలి. భవిష్యత్తులో ఎవరూ ఇలాంటి పనులు చేయకూడదనే ఉద్దేశంతో ఆమెకు ఇచ్చిన అందాల తార కిరీటాన్ని వెనక్కి తీసుకుంటున్నాం’ అని ప్రకటించింది. ఈ మేరకు నికాహ్ తన కిరీటాన్ని ఆ సంస్థకు ఇచ్చేసింది. టైటిల్ తిరిగి ఇచ్చేయడంలో ఎవరి బలవంతం లేదనీ, తనపై తనకు గల నమ్మకమే అన్నిటికన్నా విలువైనదనీ పేర్కొన్నది వీరూ నికాహ్.