చిన్నదానికి.. సన్నపూస!

నగలెప్పుడూ ధగధగలాడుతూ ఉండాలనుకుంటాం. అందుకే, కుందనపు సొంపునకు రాళ్ల మెరుపు చేరుస్తాం. సోకులన్నీ రాళ్లవేనా.. మేం మాత్రం తక్కువా? అంటున్నాయి సన్నపూసలు. కాబట్టే, అచ్చంగా వాటితోనే బోలెడు కొత్త డిజైన్లు సృష్టిస్తున్నారు ఫ్యాషనిస్టులు.

నగలెప్పుడూ ధగధగలాడుతూ ఉండాలనుకుంటాం. అందుకే, కుందనపు సొంపునకు రాళ్ల మెరుపు చేరుస్తాం. సోకులన్నీ రాళ్లవేనా.. మేం మాత్రం తక్కువా? అంటున్నాయి సన్నపూసలు. కాబట్టే, అచ్చంగా వాటితోనే బోలెడు కొత్త డిజైన్లు సృష్టిస్తున్నారు ఫ్యాషనిస్టులు. తెలుపు, ఆకుపచ్చ, ఎరుపు మాత్రమే కాదు.. బంగారం రంగు పూసలూ వీటితో జోడీ కడుతున్నాయి!

పూసలతో నగలది పాత చుట్టరికమే. చెవి దుద్దు కానీయండి, మెడ గొలుసు కానీయండి, వడ్డాణమైనా వంకీ అయినా సరే… కింద పూస వేలాడుతుంటేనే దానికి ఒంపూసొంపూ తోడవుతాయి. ఫ్యాషన్‌ సొగసుల్ని సంతరించుకుంటాయి. అందుకే రాళ్లతో సమాన హోదాను పూసలకూ ఇస్తారు డిజైనర్లు. అందులోనూ సన్నటి పూసల గుత్తులు మరింత ప్రత్యేకం. అయితే ఆ పూసలే ప్రధానంగా నగల్ని రూపొందిస్తే ఎలా ఉంటుందన్న ఆలోచన ఎవరి మదిలో మెదిలిందో కానీ సన్నసన్నటి పూసలతో అందమైన నగలెన్నో ముస్తాబయ్యాయి. రాళ్ల రాజసానికి తామేమీ తీసికట్టు కాదనేలా తయారయ్యాయి.

ఈ తరహా బంగారు నగల్లో కెంపులు, పచ్చలు, సన్న ముత్యాలు, పసిడి మువ్వలు భాగమవుతున్నాయి. ఫ్యాన్సీ వాటిలో అయితే ఎరుపు, ఆకుపచ్చ, తెలుపు రంగుల బీడ్స్‌ ఉపయోగిస్తున్నారు. ఈ రకం బీడెడ్‌ ఆభరణాల్లో చోకర్లు, నెక్లెస్‌లు, హారాలతోపాటు వడ్డాణాలు, జడబిళ్లల్లాంటివి కూడా వస్తున్నాయి. దేవతా ప్రతిమలతో టెంపుల్‌ జువెలరీ తరహాలో రూపొందుతున్నాయి. పూసల కారణంగా రంగులతో నిండుగా కనిపిస్తాయి కనుక మ్యాచింగ్‌గానూ పనికొస్తాయి.