జెన్‌-జీ బంధానికి.. జపాన్‌ పాఠాలు!

జెన్‌-జీ జంటల మధ్య బంధాలు ఎంత త్వరగా ముడి పడుతున్నాయో.. అంతే త్వరగా విడిపోతున్నాయి.ఇందుకు కారణాలు అనేకం కనిపిస్తున్నాయి. అవగాహన లోపాలు, డిజిటల్‌ ఇంట్రూషన్‌, అపరిమిత స్వేచ్ఛ.. అన్నీ కలిసి నూరేళ్ల బంధాన్ని విచ్ఛిన్నం చేస్తున్నాయి.

జెన్‌-జీ జంటల మధ్య బంధాలు ఎంత త్వరగా ముడి పడుతున్నాయో.. అంతే త్వరగా విడిపోతున్నాయి.ఇందుకు కారణాలు అనేకం కనిపిస్తున్నాయి. అవగాహన లోపాలు, డిజిటల్‌ ఇంట్రూషన్‌, అపరిమిత స్వేచ్ఛ.. అన్నీ కలిసి నూరేళ్ల బంధాన్ని విచ్ఛిన్నం చేస్తున్నాయి. ఇలా విడిపోతున్న జంటలకు కొన్ని జపనీస్‌ టెక్నిక్స్‌ అద్భుతమైన పరిష్కారం చూపుతున్నాయి. వారిలో మానసిక ప్రశాంతతను పెంచి.. బంధాలు మళ్లీ బలపడేలా చేస్తున్నాయి.

షిన్రిన్‌-యోకు: జెన్‌-జీ జంటలు ప్రకృతిలో ఎక్కువ సమయాన్ని గడపాలని అంటున్నది షిన్రిన్‌-యోకు. దీనికే ‘ఫారెస్ట్‌ బాతింగ్‌’ అని పేరు. పచ్చని చెట్లు, మొక్కల మధ్య నడవడం వల్ల.. శరీరంలోని ఒత్తిడి హార్మోన్‌ అయిన కోర్టిసోల్‌ తగ్గుతుందట. అందుకే, మీ భాగస్వామితో కలిసి పార్కులో, పచ్చని చెట్ల మధ్య మార్నింగ్‌ వాక్‌ కోసం వెళ్లండి. ఈ నడక.. ఇద్దరి మధ్య బంధాన్ని బలపర్చడంతోపాటు మనసునూ తేలికపరుస్తుంది. వారంతాల్లో పనిగట్టుకొని ఎక్కడికైనా వెళ్లి… ఓ రెండు రోజులు హాయిగా సేదతీరి రండి.

వబి-సబి: ఏ మనిషీ సంపూర్ణుడు కాదు. అలాగే, ఏ సంబంధమూ లోపాలు లేకుండా ఉండదు. అందుకే, అసంపూర్ణతలోని అందాన్ని వెతకాలని సలహా ఇస్తున్నది వబి-సబి టెక్నిక్‌. బంధంలోని చిన్నచిన్న లోపాలు, విభేదాలను అంగీకరించడం నేర్చుకోవాలి. అన్నీ పర్‌ఫెక్ట్‌గా జరగాలి, అన్నీ అనుకూలంగా ఉండాలి అనే ధోరణి తగ్గించుకోవాలి. ఎదుటివారిలో లోపాలు ఎంచడం కన్నా.. మీలోని లోపాలను సరిదిద్దుకునే ప్రయత్నం చేయండి.

కించుగి: భార్యభర్తలు అన్నాక.. గొడవలు సహజం. మనసుల్ని గాయపర్చుకోవడమూ సహజమే! మళ్లీ కలిసినప్పుడు పాత గాయాల్ని రేపుకోవడం మానేయండి. వాటినుంచి నేర్చుకున్న పాఠాలతో.. మీ బంధాన్ని మరింత బలంగా తయారు చేసుకోండి. అదే.. కించుగి టెక్నిక్‌. పగిలిన వస్తువులను అతికించి, అలంకరిస్తే.. మరింత అందంగా తయారవుతుంది కదా! గొడవ సద్దుమణిగిన తర్వాత… మళ్లీ మాటలు కలిపినప్పుడు ‘అప్పడు అలా ఎందుకన్నావు’ అని సాగదీయకుండా.. చిరునవ్వుతో
మాట కలపండి.

కాన్సెన్‌: ఎదుటివారు చెప్పేది ఏకాగ్రతతో వినడమే.. కాన్సెన్‌! నిజానికి చాలా సంబంధాలు చెడిపోవడానికి అసలు కారణం.. ఎదుటివారిని సరిగ్గా అర్థం చేసుకోకపోవడమే! కాబట్టి, భాగస్వామి గురించి ముందే తీర్పు ఇవ్వడం మానేయండి. వారు చెప్పేది పూర్తి శ్రద్ధతో వినడం అలవాటు చేసుకోండి. ఇది.. ఎదుటివారిలోని అపార్థాలను తొలగిస్తుంది. ప్రశాంతతను
అందిస్తుంది.