Bridal Shoes | పెండ్లి అనగానే వర్క్ జాకెట్లు, లెహెంగాలు ముస్తాబవుతాయి. దానికి తగ్గ ఆభరణాలు, అలంకరణ అమరిపోతాయి. ఇందులో, పారాణి పాదాలకు మ్యాచింగ్ జోళ్లు ఉండేవి కాదు. కానీ ఇప్పుడు కాలం మారింది. రిసెప్షన్లు, సంగీత్లాంటి వాటికి అమ్మాయిలు సౌకర్యంగా వేసుకునే బూట్లు కూడా పెళ్లి కూతురిలా ముస్తాబవుతున్నాయి. జర్దోసి, మిర్రర్, బీడెడ్.. ఇలా రకరకాల వర్కులున్న బ్రైడల్ షూస్ నయా వధువుల కోసం వెరైటీగా సిద్ధమవుతున్నాయి.
పెండ్లంటే.. పెద్ద విషయమే. ఉన్నట్టుండి అమ్మాయి, అబ్బాయి హీరో హీరోయిన్లుగా మారిపోతారు. ఆత్మీయులు చేయి తిరిగిన మేకప్ పర్సన్లు అయిపోతారు. పాపిట నుంచి పాదం వరకు.. ప్రతి ముస్తాబూ ప్రత్యేకంగా చేస్తారు. అందులో పాదరక్షల్ని మాత్రం పక్కకెందుకు పెట్టాలి? వాటినీ ైస్టెల్ స్టేట్మెంట్లుగా మార్చేస్తే.. మనం మరింత ప్రత్యేకంగా కనిపిస్తాం కదా అంటున్నారు నేటితరం అమ్మాయిలు. అందుకే, లెహెంగాలకు సరిపోయేలా బూట్లనూ ఫుల్వర్క్తో తయారు చేయించుకుంటున్నారు. చాలాసేపు అటూ ఇటూ తిరగాల్సిన ఇలాంటి సుదీర్ఘ కార్యక్రమాల్లో షూస్కు మించిన సౌకర్యం మరో పాదరక్షలో దొరకదు. కాబట్టి వాటినే పెండ్లికి తగ్గట్టు చేయిస్తే ముస్తాబులో మ్యాచ్ అయిపోయి ముచ్చటగా కనిపిస్తాయన్నది ఆలోచన. అందుకే, కాన్వాస్ సంస్థతో పాటు మరికొన్ని బూట్ల తయారీ కంపెనీలు బ్రైడల్ షూస్ను ప్రత్యేక కలెక్షన్గా తీసుకొస్తున్నాయి.
మనం దుస్తుల కోసం ఏయే వర్కులు చేయించుకుంటామో వాటన్నిటినీ షూస్ మీదా చేసి ఇస్తున్నాయి. అందుకే వీళ్ల కలెక్షన్లో జర్దోసి, బీడెడ్, పెర్ల్, ఎంబ్రాయిడరీ, హ్యాండ్ పెయింట్, మిర్రర్ వర్క్.. ఇలా బోలెడు డిజైన్లు ఉంటాయి. అవసరాన్ని బట్టి మార్పులు చేర్పులతో మన కోసమే ప్రత్యేకంగా చేయించుకోవచ్చు. ఇందులో కొన్ని మరీ గ్రాండ్గా వేదిక మీద మాత్రమే వేసుకునేవి ఉయితే, మరికొన్ని మాత్రం కాస్త ఫంకీగా టూర్లకు వెళ్లినప్పుడు కూడా ధరించేలా ఉంటున్నాయి. జీన్స్, ఫ్యాషన్ దుస్తుల మీదికి ట్రెండీగా వేసుకునే బూట్లు.. ఇలా హెవీ వర్కుల్లో మెరవడం కొత్త ఒరవడే.