కోట మైసమ్మ ఆలయ ప్రాంగణంలో మొక్కలు నాటిన విశ్వామిత్ర చౌహాన్

ప్రసిద్ధ ఉసిరికాయలపల్లి కోట మైసమ్మ తల్లి దేవాలయ ప్రాంగణంలో పర్యావరణ పరిరక్షణలో భాగంగా ఆదివారం మొక్కలు నాటే కార్యక్రమం నిర్వహించారు.

కారేపల్లి, అక్టోబర్ 25: ఖమ్మం జిల్లా కారేపల్లి మండలంలోని ప్రసిద్ధ ఉసిరికాయలపల్లి కోట మైసమ్మ తల్లి దేవాలయ ప్రాంగణంలో పర్యావరణ పరిరక్షణలో భాగంగా ఆదివారం మొక్కలు నాటే కార్యక్రమం నిర్వహించారు. పర్యావరణవేత్త విశ్వామిత్ర చౌహాన్, ఆలయ ధర్మకర్త పట్టాభిరామారావు, వేద పండితులతో కలిసి అరుదైన పెద్ద నేరేడు మొక్కను నాటారు. వేద పండితుల మంత్రోచ్చారణలు, ఆశీర్వచనాల మధ్య మొక్కను నాటి నీరు పోశారు.

వాక్ ఫర్ ట్రీస్ యజ్ఞంలో భాగంగా విశ్వామిత్ర చౌహాన్ నాటిన మొక్కల్లో ఇది 1606వది కావడం విశేషం. గత కొన్ని నెలలుగా ఆయన నిరంతరం మొక్కలు నాటుతూ పర్యావరణ పరిరక్షణకు కృషి చేస్తున్నారు. కోట మైసమ్మ జాతర సందర్భంగా ఆలయానికి వచ్చిన భక్తులు ఆయన పర్యావరణ సేవలను అభినందించారు. ఆలయ ప్రాంగణంలో మొక్కలు నాటడం వల్ల పచ్చదనం పెరిగి ఆహ్లాదకరమైన వాతావరణం ఏర్పడుతుందని ఆనందం వ్యక్తం చేశారు.