నమస్తే నెట్వర్క్ ; ఆడబిడ్డలకు ప్రీతిపాత్రమైన పండుగ. తొమ్మిది రోజులపాటు ఊరువాడను ఒక్కటి చేసే వేడుక. ఎనిమిది రోజులపాటు బతుకమ్మ ఆడిన మహిళలు తొమ్మిదో రోజు సంబురంగా సద్దుల బతుకమ్మ పండుగను జరుపుకున్నారు. ఆదివారం ఉమ్మడి జిల్లావ్యాప్తంగా తీరొక్క పూలతో బతుకమ్మలు పేర్చిన మహిళలు గౌరమ్మను ప్రతిష్ఠించి నియమ నిష్టలతో పూజలు చేశారు. సాయంత్రం వేళ వాగులు, చెరువుల వద్ద బతుకమ్మలను నిమజ్జనం చేసి వీడ్కోలు పలికారు.
తెలంగాణ సంస్కృతికి ప్రతీకగా నిలిచే సద్దుల బతుకమ్మ ఊరూరా సందడి తెచ్చింది. పండుగ సంబురాన్ని అంబరాన్నంటేలా చేసింది. సప్తవర్ణాలు పులుముకున్న తీరొక్క పూలను సేకరించిన మహిళలు.. ఆకర్షణీయంగా రంగులద్దడంతో మరింత శోభను సంతరించుకున్నది. సద్దుల బతుకమ్మ పండుగకు పుట్టింటికి చేరిన ఆడబిడ్డలు రంగుల పూలను వరుసగా పేర్చి శిఖరంలా అందంగా ముస్తాబు చేశారు. పైన గౌరమ్మను ప్రతిష్ఠించి మదినిండా తలుస్తూ భక్తిశ్రద్ధలతో బతుకమ్మకు పూజలు చేశారు. ఉమ్మడి జిల్లావ్యాప్తంగా ఆదివారం సాయంత్రం మేళతాళాల నడుమ బతుకమ్మలను తలపై పెట్టుకొని నదీ తీరాలు, చెరువులు, కాల్వలు, కుంటల వద్దకు పయనమయ్యారు. గట్టున చుట్టూ బతుకమ్మలను పెట్టి ‘బతుకమ్మ బతుకమ్మ ఉయ్యాలో.. బంగారు బతుకమ్మ ఉయ్యాలో.., చిత్తూ చిత్తూల బొమ్మ.. అంటూ మహిళలు, యువతులు పాటలు పాడుతూ సందడి చేశారు. బతుమ్మలను గంగమ్మ ఒడికి చేర్చి వెళ్లి రావమ్మా అంటూ వీడ్కోలు పలికారు. వాయినాలు ఇచ్చిపుచ్చుకొని వెంట తెచ్చిన పిండి పదార్థాలను పంచుకొని ఇంటిదారి పట్టారు.