Visit:
కరకగూడెం, సెప్టెంబర్ 22 : ప్రాచీన కాలం నుండి అందుబాటులో ఉన్న ఆయుర్వేద వైద్యంతో దీర్ఘకాలంగా బాధిస్తున్న మొండి వ్యాధులు పూర్తిగా తొలిగిపోతాయని కరకగూడెం ప్రభుత్వ ఆయుర్వేదిక్ వైద్యశాల వైద్యాధికారిణి గుమ్మడి అరుణ అన్నారు. మంగళవారం మండలంలోని సమతభట్టుపల్లి పంచాయతీలో జాతీయ ఆయుర్వేద దినోత్సవాన్ని పురస్కరించుకుని వైద్య శిబిరాన్ని నిర్వహించారు. పలు రకాల వ్యాధులతో బాధపడుతున్న గ్రామస్తులకు వైద్య పరీక్షలు నిర్వహించి ఉచితంగా మందులు పంపిణీ చేశారు. ఈ సందర్భంగా ఆమె మాట్లాడుతూ.. ప్రజలు ఆయుర్వేద మందులను సద్వినియోగం చేసుకోవాలని సూచించారు. ఆధునిక వైద్యంలో కేవలం లక్షణాలను అణచివేసే చికిత్సలు ఎక్కువగా ఉంటాయని, కానీ ఆయుర్వేదంలో వ్యాధి మూలాలను గుర్తించి శరీరాన్ని శాశ్వతంగా ఆరోగ్యవంతం చేయడానికి మందులు ఎంతో సహకరిస్తాయని వివరించారు. అన్ని రకాల మందులు ఆయుర్వేద ఆస్పత్రిలో అందుబాటులో ఉన్నాయని స్పష్టం చేశారు. ఈ కార్యక్రమంలో సర్పంచ్ కొమరం సత్యనారాయణ, పంచాయతీ కార్యదర్శి సమ్మయ్య, వైద్య సిబ్బంది రాధిక, నాగేష్ పాల్గొన్నారు.
