మా ఊర్లోకి ప్రైవేట్‌ స్కూల్‌ బస్సులు రావద్దు

తమ గ్రామంలోకి ప్రైవేట్‌ పాఠశాలల బస్సులు రావద్దని కథలాపూర్‌ మండలం పెగ్గెర్ల గ్రామ మహిళలు గురువారం అడ్డుకొని వాపస్‌ పంపించారు.

కథలాపూర్‌, జూన్‌ 20 : తమ గ్రామంలోకి ప్రైవేట్‌ పాఠశాలల బస్సులు రావద్దని కథలాపూర్‌ మండలం పెగ్గెర్ల గ్రామ మహిళలు గురువారం అడ్డుకొని వాపస్‌ పంపించారు. గ్రామస్తుల వివరాల ప్రకారం.. గ్రామంలోని ప్రభుత్వ ప్రాథమికోన్నత పాఠశాలలో ఒకటి నుంచి ఎనిమిదో తరగతి వరకు 72 మంది విద్యార్థులు, 8 మంది ఉపాధ్యాయులు ఉన్నారు. గ్రామానికి చెందిన విద్యార్థులు వివిధ ప్రైవేట్‌ పాఠశాలల్లో 100 మంది చదువుకుంటున్నారు.

ఇలా అయితే గ్రామ ప్రభుత్వ పాఠశాల మూసేసే పరిస్థితులు వస్తాయని మహిళలందరూ సమావేశమై గ్రామానికి ప్రైవేట్‌ పాఠశాలల బస్సులను రానీయవద్దని నిర్ణయించుకున్నారు. ఈ మేరకు గురువారం ఉదయం వాటిని అడ్డుకున్నారు. గ్రామంలోని విద్యార్థులను స్థానిక ప్రభుత్వ పాఠశాలలోనే చేర్పించాలని నిర్ణయించారు. సుమారు రెండు గంటల పాటు గ్రామస్తులు, మహిళలు గ్రామశివారులో రోడ్డుపై నిలబడి ప్రైవేట్‌ పాఠశాలల బస్సులు రాకుండా చూశారు.