Visit:
జగిత్యాల : కేసీఆర్ ( KCR ) చేపట్టిన దీక్ష భారత రాజకీయాల్లో కీలక మలుపని బీఆర్ఎస్ జగిత్యాల జిల్లా అధ్యక్షులు కల్వకుంట్ల విద్యాసాగర్ రావు ( Kalvakuntla Vidyasagar ) అన్నారు. 16వ దీక్షా దివస్( Deeksha Diwas) సందర్భంగా జిల్లా కేంద్రంలోని బీఆర్ఎస్ కార్యాలయంలో తెలంగాణ తల్లి విగ్రహానికి పూలమాల వేసి నివాళులర్పించి, కేసీఆర్ చిత్రపటానికి పాలాభిషేకం చేసారు.
ఈ సందర్భంగా ఆయన మాట్లాడుతూ 2009 నవంబర్ 29న కేసీఆర్ చేపట్టిన ఆమరణ నిరాహార దీక్ష తెలంగాణ చరిత్రలోనే కాదు, భారత రాజకీయాల్లో ఒక మహత్తర ఘట్టమని పేర్కొన్నారు. ఈ దీక్ష ప్రజల్లో పెరిగిన తెలంగాణ ఆత్మగౌరవ జ్వాలను మరింతగా రగిలించి, సమూహ స్ఫూర్తిని పెంచి, చివరికి తెలంగాణ రాష్ట్ర సాధనకు బాటలు వేసిందని గుర్తుచేశారు.
తెలంగాణ ఉద్యమం కోసం తన ప్రాణాలను అర్పించిన అమరవీరుల త్యాగాలు ఎప్పటికీ మరవలేనివని, వారి ఆశయాలను నెరవేర్చడం కోసం బీఆర్ఎస్ ఎల్లప్పుడూ ప్రజలతో పాటే ఉండి పనిచేస్తుందన్నారు. ప్రజల జీవన ప్రమాణాలను మెరుగుపర్చేందుకు బీఆర్ఎస్ ఎల్లప్పుడూ ముందుండి పోరాటం చేస్తుందని తెలిపారు.
2009 నవంబర్ 29 లో కరీంనగర్ నుంచి సిద్దిపేట దీక్ష శిబిరానికి వెళ్తున్న కేసీఆర్‌ను కరీంనగర్‌లో అరెస్ట్ చేసిన కూడా జైలులో దీక్ష చేపట్టడడంతో కేంద్రం దిగివచ్చి తెలంగాణ రాష్ట్రాన్ని ప్రకటించిందని అన్నారు. తెలంగాణ రాష్ట్రానికి కేసీఆర్ శ్రీ రామ రక్షా అని, ఎన్నికలు ఎప్పుడు వచ్చిన మళ్లీ వచ్చేది బీఆర్‌ఎస్‌దేనని ధీమాను వ్యక్తం చేశారు.
కార్యక్రమంలో కోరుట్ల ఎమ్మెల్యే సంజయ్, జడ్పీ మాజీ చైర్మన్ దావ వసంత, డీసీఎంఎస్ చైర్మన్ శ్రీకాంత్ రెడ్డి, మార్క్‌ఫెడ్ మాజీ చైర్మన్ లోక బాపు రెడ్డి, ధర్మపురి మున్సిపల్ మాజీ చైర్‌పర్సన్‌ సంగి సత్తమ్మ, మాజీ కౌన్సిలర్లు దేవేందర్ నాయక్, అవారి శివాకేసారి బాబు, దారిశెట్టి రాజేష్, మాజీ ఎంపీటీసీలు, జడ్పీటీసీలు, సింగిల్ విండో చైర్మన్లు, మాజీ కౌన్సిలర్లు, నాయకులు, కార్యకర్తలు పాల్గొన్నారు.
