Mannempalli | మన్నెంపల్లిలో వీవో బిల్డింగ్ నిర్మాణానికి సహకరించాలి.. భరతమాత వీవో అధ్యక్షురాలు మార్కొండ లత

తమకు రాజకీయాలతో సంబంధం లేదని.. గ్రామ పాలకవర్గం, ఎమ్మెల్యే కవ్వంపల్లి సత్యనారాయణ చొరవ తీసుకుని మహిళా సమాఖ్య భవనం నిర్మాణం అయ్యేలా చూడాలని భరతమాత గ్రామైక్య సంఘం అధ్యక్షురాలు మార్కొండ లత కోరారు.

Mannempalli | తిమ్మాపూర్, సెప్టెంబర్ 22 : తమకు రాజకీయాలతో సంబంధం లేదని.. గ్రామ పాలకవర్గం, ఎమ్మెల్యే కవ్వంపల్లి సత్యనారాయణ చొరవ తీసుకుని మహిళా సమాఖ్య భవనం నిర్మాణం అయ్యేలా చూడాలని భరతమాత గ్రామైక్య సంఘం అధ్యక్షురాలు మార్కొండ లత కోరారు. కరీంనగర్ జిల్లా తిమ్మాపూర్ మండలం మన్నెంపెల్లి గ్రామంలో కొత్త వివో భవన నిర్మాణానికి పంచాయతీ పాలకవర్గంతో పాటు ఎమ్మెల్యే కవ్వంపల్లి సత్యనారాయణ సహకరించాలని కోరారు. ఎల్ఎండీలో లత మంగళవారం మీడియాతో మాట్లాడారు. గతంలో సర్పంచ్ గా పనిచేసిన గడ్డం సుగుణ వీవో భవనానికి స్థలం కేటాయించారని, ఆ స్థలంలో కొత్త గ్రామపంచాయతీ భవనం కట్టగా, పాత గ్రామ పంచాయతీ భవనాన్ని మహిళా సంఘానికి వాడుకున్నామని తెలిపారు.

ఇటీవల కలెక్టర్ నిధులు కేటాయించడంతో పాత గ్రామ పంచాయతీని కూల్చివేసి అందులో కొత్త కొత్త భవనం నిర్మించేలా చూడాలని ఎమ్మెల్యేను కోరమన్నారు. అయితే భవనం కూల్చకుండా ప్రస్తుత సర్పంచ్ పొన్నం సునీత అనిల్ గౌడ్ అడ్డుకోవడంతో గ్రామంలో గొడవ జరిగిందనీ, ఆ గొడవకు మహిళా సంఘాలకు ఎలాంటి సంబంధం లేదనీ స్పష్టం చేశారు. ప్రస్తుతం పాత పంచాయతీ భవనం కూల్చి వేశారని, ఆ స్థలంలో కొత్త భవనం నిర్మించేలా పంచాయతీ పాలకవర్గం తీర్మానం ఇవ్వాలని కోరారు. మహిళా సంఘాలకు, రాజకీయ పార్టీలకు ఎలాంటి సంబంధం లేదనీ, కావున వెంటనే భవన నిర్మాణం పూర్తిచేసి, మహిళలకు అందుబాటులోకి తేవాలని కోరారు.