CP Amber Kishore Jha | పెద్దపల్లి జోన్‌లో పోలీస్‌స్టేషన్ల పరిధిలో పలు గ్రామాల మార్పులు : సీపీ అంబర్‌ కిషోర్‌ ఝా

CP Amber Kishore Jha | జోన్‌ పరిధిలో ఉన్న గోదావరిఖని వన్‌టౌన్, రామగుండం, బసంత్‌నగర్ పోలీస్ స్టేషన్ల పరిధిలో మార్పులు చేస్తూ ప్రభుత్వం ఉత్తర్వులు జారీ చేసిందని రామగుండం పోలీస్ కమిషనర్ అంబర్ కిశోర్ ఝా తెలిపారు.

పెద్దపల్లి : పెద్దపల్లి జోన్‌ ( Peddapalli Zone ) పరిధిలో ఉన్న గోదావరిఖని వన్‌టౌన్, రామగుండం, బసంత్‌నగర్ పోలీస్ స్టేషన్ల పరిధిలో మార్పులు చేస్తూ తెలంగాణ ప్రభుత్వం అధికారిక గెజిట్ ఉత్తర్వులు జారీ చేసిందని రామగుండం పోలీస్ కమిషనర్ అంబర్ కిశోర్ ఝా (CP Amber Kishore Jha) తెలిపారు.

పరిపాలన సౌలభ్యం, ప్రజలకు పోలీసు సేవలను మరింత చేరువ చేయడం, శాంతిభద్రతల నిర్వహణను సమర్థవంతంగా చేపట్టడం లక్ష్యంగా ప్రభుత్వం ఈ నిర్ణయం తీసుకుందని వెల్లడించారు. ప్రస్తుతం గోదావరిఖని టూ టౌన్ పోలీస్ స్టేషన్ పరిధిలో ఉన్న జనగామ గ్రామం, సమ్మక్క,సారలమ్మ గద్దెలు ( Sammkka, Saralamma ) , గోదావరి వంతెన, గంగానగర్ ప్రాంతాలను గోదావరిఖని వన్‌టౌన్ పోలీస్ స్టేషన్ పరిధిలోకి మార్చారని వివరించారు.

ప్రస్తుతం పెద్దపల్లి సర్కిల్ పరిధిలో ఉన్న బసంత్‌నగర్ పోలీస్ స్టేషన్‌ను రామగుండం సర్కిల్ పరిధిలోకి మార్చి, గోదావరిఖని ఉపవిభాగం (సబ్‌డివిజన్) పరిధిలో చేర్చారని ఆయన వివరించారు. అంతర్గాం పోలీస్ స్టేషన్ పరిధిలో ఉన్న లింగాపూర్, కుందన్‌పల్లి గ్రామాలను రామగుండం పోలీస్ స్టేషన్ పరిధిలోకి చేర్చారని వెల్లడించారు.