Space Wedding : అంతరిక్షంలో వరుడు.. టెక్సాస్‌లో వధువు.. వీడియో కాల్‌లో పెండ్లి

Space Wedding : అంతరిక్షంలో ఉన్న వరుడితో టెక్సాస్‌లో వధువు వివాహం. 18 ఏండ్ల క్రితం సరిగ్గా ఇదే రోజున జరిగిన ఈ పెండ్లి ఇప్పటికీ ప్రత్యేకమైనదిగానే రికార్డుల్లో భద్రంగా ఉన్నది. అంతరిక్ష కేంద్రంలో ...

August 10, 2021 / 12:55 PM IST

Space Wedding : అంతరిక్షంలో వరుడు.. టెక్సాస్‌లో వధువు.. వీడియో కాల్‌లో పెండ్లి

మనం ఎన్నో పెండ్లిళ్లకు హాజరవుతుంటాం. ఎక్కడైనా ప్రత్యేకంగా జరిగితే పది మందికి చెప్తాం. ఇప్పటివరకు మనం చూడని పెండ్లి ఒకటి అంగరంగ వైభవంగా జరిగింది. అదే అంతరిక్షంలో ఉన్న వరుడితో టెక్సాస్‌లో వధువు వివాహం. 18 ఏండ్ల క్రితం సరిగ్గా ఇదే రోజున జరిగిన ఈ పెండ్లి ఇప్పటికీ ప్రత్యేకమైనదిగానే రికార్డుల్లో భద్రంగా ఉన్నది. అంతరిక్ష కేంద్రంలో (Space Wedding) పనిచేస్తున్న రష్యన్‌ వ్యోమగామి యూరి మాలెన్‌చెంకో వివాహం.. టెక్సాస్‌లో ఉన్న కటారినా డిమిత్రివ్‌ను వివాహమాడాడు. ప్రపంచంలో ఇలా అంతరిక్షం నుంచి వివాహం చేసుకున్న తొలి వ్యక్తిగా యూరి మాలెన్‌చెంకో నిలిచారు.

రష్యాకు చెందిన యూరి గగారిన్ 1961 ఏప్రిల్ 12 న అంతరిక్షంలోకి అడుగుపెట్టిన ప్రపంచంలో తొలి మానవుడు అయ్యాడు. గగారిన్ సాధించిన ఈ వార్షికోత్సవం సందర్భంగా 2003 లో ఒక పార్టీ జరిగింది. ఇక్కడే యూరి మాలెన్‌చెంకో, కటారినా డిమిత్రివ్‌ చూపులు కలిశాయి. అనంతరం 2003 ఏప్రిల్‌ నెలలో నిర్వహించిన రష్యా ఎక్స్‌పెడిషన్‌-7 లో యూరి మాలెన్‌చెంకో అంతరిక్షంలోకి వెళ్లారు. మిషన్ నుంచి తిరిగి రాగానే వివాహం చేసుకోవాలని నిశ్చయించుకున్నారు. మిషన్‌కు వెళ్లడానికి ముందీ వీరి వివాహ తేదీ ఆగస్టు 10 అని నిర్ణయించారు. అయితే, ఆగస్ట్‌ మొదటివారంలో పూర్తికావాల్సిన మిషన్.. అక్టోబర్ వరకు పొడిగించారు. దాంతో వీరి పెండ్లికి అన్ని సన్నాహాలు పూర్తవడంతో.. వాయిదా వేసుకోవడం ఇష్టం లేని యూరి మాలెన్‌చెంకో తన ప్రేయసిని అంతరిక్షం నుంచే వివాహం చేసుకోవడానికి సమ్మతం తెలిపాడు. రష్యా నిబంధనల ప్రకారం వివాహానికి వధూవరులు ఇద్దరూ హాజరుకావాలి. అయితే, కటారినా చాలా కాలంగా టెక్సాస్‌లో నివసిస్తున్నది. టెక్సాస్‌ నిబంధనల ప్రకారం ఇద్దరూ పెండ్లికి హాజరుకావాల్సిన అవసరం లేదు.

ఇదే సమయంలో నాసా అభ్యంతరపెట్టింది. అంతరిక్ష కేంద్రానికి వ్యక్తిగత విషయాలకు వాడుకోవడానికి అనుమతించలేదు. ఈ వార్త అప్పట్లో సంచలనంగా మారింది. వీరి పెండ్లిపై ప్రపంచవ్యాప్తంగా ఆసక్తి రేపింది. తుదకు నాసా తన సమ్మతిని తెలుపక తప్పలేదు. ఇంకేం వీరి పెండ్లికి ఉన్న అడ్డంకులు తొలిగిపోయాయి. చివరకు వీడియో కాల్‌ ద్వారా ఇద్దరు పెండ్లి ప్రమాణాలు చేసుకొని ఒక్కటయ్యారు. ప్రపంచంలో ఇదే తొలి, చివరి పెండ్లిగా నిలిచిపోనున్నది. ఈ పెండ్లి తర్వాత అంతరిక్ష సంస్థలు ఇలాంటి వ్యక్తిగత పనుల కోసం అంతర్జాతీయ అంతరిక్ష కేంద్రాన్ని వినియోగించుకోవడంపై నిషేధం విధించాయి.