Visit:
Donald Trump : తైవాన్ (Taiwan) స్వాతంత్ర్య కాంక్ష్యపై అమెరికా అధ్యక్షుడు (US President) డొనాల్డ్ ట్రంప్ (Donald Trump) కీలక వ్యాఖ్యలు చేశారు. తైవాన్ స్వాతంత్ర్యం కోసం పోరాడటం తమకు కష్టమైన సమస్యేనని అన్నారు. భౌగోళికంగా తైవాన్ తమకు చాలా దూరంలో ఉందని వ్యాఖ్యానించారు. తైవాన్ ద్వీపం చైనా (China) కు కేవలం 95 కిలోమీటర్ల దూరంలో ఉండగా.. అమెరికాకు మాత్రం 15 వేల కిలోమీటర్లకుపైగా దూరాన ఉందని చెప్పారు. ఎక్కువ దూరం కాబట్టి వేగంగా స్పందించడం కష్టమని వ్యాఖ్యానించారు. చైనా చాలా శక్తిమంతమైన పెద్ద దేశమని అన్నారు.
ఉద్రిక్తతల విషయంలో చైనా, తైవాన్లు సంయమనం పాటించాలని ట్రంప్ సూచించారు. వారి స్వాతంత్ర్య ఆకాంక్షల కోసం తాము అంతదూరం ప్రయాణించి యుద్ధం చేయాలని అనుకోవడం లేదని చెప్పారు. చైనా పర్యటన అనంతరం ట్రంప్ ఈ వ్యాఖ్యలు చేయడం ప్రాధాన్యం సంతరించుకుంది. తైవాన్ సమస్యను సరిగ్గా పరిష్కరించకపోతే అమెరికా-చైనా మధ్య ఘర్షణ తలెత్తే ప్రమాదం ఉందని ట్రంప్నకు జిన్పింగ్ స్పష్టంచేసినట్లు వార్తలు వచ్చాయి. అమెరికా- చైనాలు భాగస్వామ్య దేశాలుగా ఉండాలే తప్ప ప్రత్యర్థులుగా కాదని జిన్పింగ్ అన్నట్లు సమాచారం.
ఈ నేపథ్యంలో ట్రంప్ మాటమార్చడం చర్చనీయాంశమైంది. కాగా తైవాన్ను తనలో పూర్తిగా విలీనం చేసుకోవాలని చైనా కోరుకుంటోంది. తైవాన్ స్వాతంత్య్రాన్ని అమెరికా బహిరంగంగా వ్యతిరేకించాలన్నది చైనా వాదన. ఈ క్రమంలో ‘తైవాన్ విషయంలో చైనా ఏకపక్ష చర్యలకు దిగరాదు’ అని ఇంతకాలం అమెరికా స్పష్టంచేస్తూ వచ్చింది. అందుకు భిన్నంగా ఇప్పుడు ట్రంప్ మాట్లాడుతున్నారు. తైవాన్కు ఆయుధాలు విక్రయించాలా, వద్దా అనే అంశంపై ఇంకా నిర్ణయం తీసుకోలేదని ట్రంప్ చెప్పారు. ఈ వ్యాఖ్యలు కూడా ఆయన వైఖరిలో మార్పును వెల్లడిస్తున్నాయి.
