Dark Energy | అనంత విశ్వంలో అదృశ్య శక్తి..

అనంత విశ్వంలో ఎన్నో పాలపుంతలు.. అందులో కోటానుకోట్ల నక్షత్రాలు. ఎంత దూరం ప్రయాణిస్తూ ఉంటే అంత దూరం విశ్వమే. మరి ఈ విశ్వం ఎంతవరకు ఉన్నది? ఏ స్థాయిలో విస్తరిస్తున్నది? అసలు విశ్వం ఎలా ఏర్పడింది? అన్న ప్రశ్నలకు తలపండిన ఖగోళ శాస్త్రవేత్తలు కూడా సమాధానం కనుగొనలేకపోయారు.

Dark Energy | సిడ్నీ: అనంత విశ్వంలో ఎన్నో పాలపుంతలు.. అందులో కోటానుకోట్ల నక్షత్రాలు. ఎంత దూరం ప్రయాణిస్తూ ఉంటే అంత దూరం విశ్వమే. మరి ఈ విశ్వం ఎంతవరకు ఉన్నది? ఏ స్థాయిలో విస్తరిస్తున్నది? అసలు విశ్వం ఎలా ఏర్పడింది? అన్న ప్రశ్నలకు తలపండిన ఖగోళ శాస్త్రవేత్తలు కూడా సమాధానం కనుగొనలేకపోయారు. ఇప్పటి వరకు విశ్వంలో మన కంటికి కనిపించేదంతా 5 శాతం అని, 25 శాతం కృష్ణపదార్థమని శాస్త్రవేత్తలు భావిస్తూ వస్తున్నారు. మిగతా 70 శాతం డార్క్‌ ఎనర్జీ (అదృశ్య శక్తి) వాటానేనని అంచనా వేస్తూ వచ్చారు.

ఈ డార్క్‌ ఎనర్జీ వల్లే విశ్వం విస్తరిస్తున్నదని చెప్తున్నారు. అయితే, డార్క్‌ ఎనర్జీకి సంబంధించి కచ్చితమైన లక్షణాలేవీ ఎవరికీ తెలియదు. కానీ, ఆ దిశగా ఆస్ట్రేలియాకు చెందిన ఆస్ట్రేలియన్‌ నేషనల్‌ యూనివర్సిటీ ఖగోళ శాస్త్రవేత్తలు, కాస్మాలజిస్టులు పరిశోధనలు చేసి తొలిసారి డార్క్‌ ఎనర్జీ లక్షణాలను గుర్తించగలిగారు. విశ్వ వ్యాప్తిలో నక్షత్రాల పాత్ర ఎంతో కీలకమని, ఆ నక్షత్రాలు పేలిపోయే సందర్భాలు మరింత వ్యాప్తికి కారణమవుతున్నాయని వెల్లడించారు. ఆ నక్షత్రాలే ఇప్పుడు డార్క్‌ ఎనర్జీ లక్షణాలను తెలియజేస్తున్నాయని వివరించారు. మనం ఊహించినదానికన్నా డార్క్‌ ఎనర్జీ అత్యంత సంక్లిష్టమైనదని పేర్కొన్నారు.