Visit:
Vaccine | న్యూయార్క్‌, డిసెంబర్‌ 13: సూది అవసరం లేని, క్రీమ్‌లా రాసుకునే సరికొత్త వ్యాక్సిన్‌ విధానాన్ని అమెరికాలోని స్టాన్‌ఫర్డ్‌ యూనివర్సిటీకి చెందిన శాస్త్రవేత్తలు అభివృద్ధి చేశారు. వ్యాధులు సోకకుండా నివారించడానికి వేసే వ్యాక్సిన్ల వల్ల సాధారణంగా నొప్పి, జ్వరం వంటి సైడ్‌ ఎఫెక్ట్స్‌ ఉంటాయి. ఈ కొత్త విధానం ద్వారా ఇలాంటి సైడ్‌ ఎఫెక్ట్స్‌ దాదాపుగా ఉండవని శాస్త్రవేత్తలు చెప్తున్నారు. స్టఫిలోకాకస్‌ ఎపిడెర్మిడిస్‌ వంటి సాధారణ చర్మ బ్యాక్టీరియా ఆధారంగా వ్యాక్సిన్‌లను శరీరానికి ఇవ్వొచ్చని వీరు ప్రతిపాదిస్తున్నారు. శాస్త్రవేత్తలు ఈ బ్యాక్టీరియాను మాడిఫై చేసి ధనుర్వాతానికి కారణమయ్యే రసాయనంతో కలిపి ఎలుక చర్మంపై పూయగా, దాని శరీరంలో పెద్ద సంఖ్యలో యాంటీబాడీలు ఉత్పత్తి అయ్యాయని గుర్తించారు.
ఆ తర్వాత ఈ రసాయనాన్ని ఎలుకకు నేరుగా ఇవ్వగా యాంటీబాడీలు అప్రమత్తమై దాని ప్రభావం లేకుండా చేశాయి. భవిష్యత్తులో ఇలాంటి సాధారణ చర్మ బ్యాక్టీరియాలను వ్యాక్సిన్లతో మాడిఫై చేసి క్రీమ్‌లా చర్మంపై పూయడం ద్వారా శరీరంలో యాంటీబాడీలను ఉత్పత్తి చేయవచ్చని ప్రొఫెసర్‌ మైఖేల్‌ ఫిష్బాచ్‌ తెలిపారు. ఎలుకలపై తమ కొత్త విధానం పని చేసిందని, తర్వాత కోతులపై ఈ పరీక్షలు జరుపుతామని చెప్పారు. భవిష్యత్తులో ఈ విధానం సూది, నొప్పి లేని వ్యాక్సిన్ల అభివృద్ధికి దోహదపడుతుందని తెలిపారు.
