Neuroprosthetic | సిడ్నీ, మార్చి 10: వృద్ధాప్యం, కంటి సమస్యల కారణంగా కోల్పోయిన కంటిచూపును పునరుద్ధరించేందుకు ఆస్ట్రేలియాకు చెందిన పరిశోధకులు సరికొత్త ఆలోచన చేస్తున్నారు. న్యూరోప్రోస్టెటిక్ టెక్నాలజీ ద్వారా కంటిచూపును తీసుకురావచ్చని భావిస్తున్నారు. వినికిడి లోపం ఉన్న వారికి కోక్లియర్ ఇంప్లాంట్ ద్వారా చిన్న ఎలక్ట్రానిక్ పరికరాన్ని చెవి లోపలి భాగంలో అమర్చి వినికిడి నాడిని ప్రేరేపించి వినికిడి శక్తిని పెంచుతున్నట్టుగానే కంటిచూపునూ పునరుద్ధరించవచ్చని నమ్ముతున్నారు. ఆస్ట్రేలియాలోని న్యూ సౌత్ వేల్స్ యూనివర్సిటీకి చెందిన పరిశోధకులు ఈ మేరకు ప్రయత్నాలు ప్రారంభించారు.
కాంతిని గ్రహించే రెటీనాలోని కణాలు, ఫొటోరిసెప్టర్లు దెబ్బతిన్న వారిలో ఈ న్యూరోప్రొస్టెటిక్ టెక్నాలజీ ద్వారా కంటిచూపును పునరుద్ధరించే అవకాశం ఉందని వీరు చెప్తున్నారు. కనుబొమ్మలో కెమెరా సెన్సర్ చిప్ను పెట్టడం ద్వారా ఇది సాధ్యమవుతుందని భావిస్తున్నారు. అయితే, ఈ సెన్సర్ను ఛార్జ్ చేయాల్సి ఉంటుంది. ఒకసారి కనుబొమ్మలో అమర్చిన తర్వాత ఛార్జ్ చేయడం సాధ్యం కాదు. ఈ సమస్యకు పరిష్కారంగా కాంతిని విద్యుత్తుగా మార్చగలిగే అతి సూక్ష్మ సోలార్ ఫొటోవాైల్టెక్ ప్యానళ్లను కూడా కంటిలో అమర్చాలని భావిస్తున్నారు. ఈ రెండు టెక్నాలజీలను అనుసంధానం చేయడం ద్వారా కంటిచూపును పునరుద్ధరించవచ్చని చెప్తున్నారు. అయితే, ఇది ఇంకా ప్రాథమిక దశలోనే ఉన్నది.