న‌టి మెర్కెల్‌ను వివాహ‌మాడిన ప్రిన్స్‌ హ్యారీ.. చ‌రిత్ర‌లో ఈరోజు

అమెరికాకు చెందిన న‌టి, కాలిఫోర్నియాలో నివ‌సించే మేగాన్ మెర్కెల్‌ను బ్రిట‌న్ యువ‌రాజు ప్రిన్స్ హ్యారీ 2018 స‌రిగ్గా ఇదే రోజున వివాహ‌మాడారు

May 19, 2021 / 01:17 PM IST

న‌టి మెర్కెల్‌ను వివాహ‌మాడిన ప్రిన్స్‌ హ్యారీ.. చ‌రిత్ర‌లో ఈరోజు

అమెరికాకు చెందిన న‌టి, కాలిఫోర్నియాలో నివ‌సించే మేగాన్ మెర్కెల్‌ను బ్రిట‌న్ యువ‌రాజు ప్రిన్స్ హ్యారీ 2018 స‌రిగ్గా ఇదే రోజున వివాహ‌మాడారు. వీరి వివాహం బ్రిట‌న్లోని విండ్స‌ర్ సెయింట్ జార్జ్ చాపెల్‌లో అంగ‌రంగ వైభ‌వంగా జ‌రిగింది. పెండ్లి జ‌రగ్గానే డ్యూక్ అండ్ డ‌చెస్ ఆఫ్ సస్సెక్స్ అనే బిరుదును మెర్కెల్‌, హ్యారీల‌కు రాణి అంద‌జేసి బ్రిట‌న్ రాజ సంప్ర‌దాయాన్ని కొన‌సాగించారు.

వీరిద్దరూ 2016 నుంచి ప్రేమ‌లో ఉన్న‌ట్లు చెప్తారు. ఈ పుకార్ల‌ను ప‌టాపంచ‌లు చేస్తూ 2017 నవంబర్ లో ప్రిన్స్ హ్యారీ, మేగాన్ మెర్కెల్‌ నిశ్చితార్థాన్ని ప్రకటిస్తూ ప్రిన్స్ చార్లెస్ ఒక ప్రకటన విడుదల చేశారు. 2018 లో వీరి వివాహం కాగా, 2019 మే 6 న, ఆర్చీ అనే బిడ్డకు మేగాన్ మెర్కెల్ జన్మనిచ్చింది.

అక్టోబర్ 2019 లో రాజకుటుంబానికి, ఈ ఇద్దరి మధ్య అంతగా పొస‌గ‌డం లేదని వార్తలు రావడం ప్రారంభ‌మ‌య్యాయి. మీడియా ఊహాగానాలు చివరకు సరైనవని తేలుతూ.. 2020 జనవరి 9 న రాజకుటుంబం నుంచి విడిపోతున్నట్లు ప్రిన్స్ హ్యారీ, మెర్కెల్ దంప‌తులు ప్రకటించారు. ఈ స‌మాచారాన్ని వీరు త‌మ‌ ఇన్‌స్టాగ్రామ్ ఖాతాలో పంచుకున్నారు. ‘చాలా నెలల ఆలోచన తర్వాత‌.. చివరికి రాజ కుటుంబానికి చెందిన సీనియర్ సభ్యుల పదవిని వీడుతున్నామని, ఆర్థికంగా స్వతంత్రంగా మారడానికి కృషి చేస్తామని నిర్ణయించుకున్నాం’ అని ప్ర‌క‌టించారు. అప్పుడే ఈ జంట’ రాయల్ హైనెస్ ‘బిరుదును, రాయల్ ఫ్యామిలీ అన్ని సౌకర్యాలను విడిచిపెట్టి అమెరికాలోని కాలిఫోర్నియాకు వెళ్లారు.

కాగా, గ‌త మార్చి నెల‌లో ప్ర‌సిద్ధ టీవీ షో నిర్వ‌హించే ఓప్రా విన్‌ఫ్రేకి ఇచ్చి ఇంట‌ర్వ్యూలో వీరు రాజకుటుంబంలో తానెదుర్కొన్న స‌మ‌స్య‌ల‌ను ఏక‌ర‌వు పెట్టారు. త‌మ‌కు పుట్ట‌బోయే బిడ్డ రంగు గురించి కూడా చ‌ర్చించార‌ని మెర్కెల్ చేసిన ఆరోప‌ణ‌లు పెద్ద దుమార‌మే లేపాయి. చివ‌ర‌కు రాజ‌కుటుంబం ఈ విషయంలో వివ‌ర‌ణ ఇచ్చుకోవాల్సి వ‌చ్చింది.