ముగ్గురు పాక్‌ పౌరుల సైబర్‌ నేరాలు

కెనడాలో నివసిస్తున్న నలుగురు భారతీయులతో కలిసి అక్కడి బ్యాంక్‌లను మోసం చేస్తున్న ముగ్గురు పాక్‌ జాతీయులను ఆ దేశ సైబర్‌ క్రైమ్‌ అధికారులు సోమవారం లాహోర్‌లో అరెస్ట్‌ చేశారు. ఏఐ ద్వారా నకిలీ గుర్తింపులను సృష్టించడానికి, రిమోట్‌గా బ్యాంక్‌ ఖాతాలను తెరవడానికి, మోసపూరితంగా క్రెడిట్‌ కార్డులను పొందడానికి కెనడాలో నివసిస్తున్న నలుగురు భారతీయులతో కలిసి ఈ ముగ్గురూ పనిచేసినట్టు ఆరోపణలు ఉన్నాయి.

• నలుగురు భారతీయులతో కలిసి

లాహోర్‌, అక్టోబర్‌ 21: కెనడాలో నివసిస్తున్న నలుగురు భారతీయులతో కలిసి అక్కడి బ్యాంక్‌లను మోసం చేస్తున్న ముగ్గురు పాక్‌ జాతీయులను ఆ దేశ సైబర్‌ క్రైమ్‌ అధికారులు సోమవారం లాహోర్‌లో అరెస్ట్‌ చేశారు. ఏఐ ద్వారా నకిలీ గుర్తింపులను సృష్టించడానికి, రిమోట్‌గా బ్యాంక్‌ ఖాతాలను తెరవడానికి, మోసపూరితంగా క్రెడిట్‌ కార్డులను పొందడానికి కెనడాలో నివసిస్తున్న నలుగురు భారతీయులతో కలిసి ఈ ముగ్గురూ పనిచేసినట్టు ఆరోపణలు ఉన్నాయి. కెనడా బ్యాంక్‌లు లక్ష్యంగా వీరు పలు మోసపూరిత కార్యకలాపాలు నిర్వహించారు. భారత్‌కు చెందిన దీప్‌ సింగ్‌, పర్జీత్‌ సింగ్‌, హర్‌ప్రీత్‌ సింగ్‌, గుర్లీన్‌ సింగ్‌లు కెనడాలో ఉంటున్నారు. వీరు ఏఐ ద్వారా నకిలీ పాస్‌పోర్టు చిత్రాలు, ఫొటోగ్రాఫ్‌లు, ఇతర ఐడెంటిటీలు సృష్టించేవారు.

వీటిని పాక్‌లోని సహచరులకు అందజేసేవారు. దీని సహాయంతో ఆ ముగ్గురూ తమ దగ్గర ఉన్న కొన్ని డాక్యుమెంట్లను ఉపయోగించి ఆన్‌లైన్‌లో బ్యాంక్‌ ఖాతాలు తెరిచేవారు. డిజిటల్‌ బ్యాంకింగ్‌ సెక్యూరిటీ వ్యవస్థలోని లోపాలను వీరు తమకు అనుకూలంగా మార్చుకునేవారని పాకిస్థాన్‌ నేషనల్‌ సైబర్‌ క్రైమ్‌ ఇన్వెస్టిగేషన్‌ ఏజెన్సీ అధికారులు తెలిపారు. దీనికోసం వారు డాల్ఫిన్‌ యాంటీ అనే సాఫ్ట్‌వేర్‌ను వినియోగించేవారు. ఖాతా తెరిచేటప్పుడు కొన్ని డిజిటల్‌ గుర్తింపు ధ్రువీకరణలను దాటవేయడానికి అది ఉపయోగపడేది. ఖాతా తెరిచిన తర్వాత, దాని నుంచి జారీ అయిన క్రెడిట్‌ కార్డులు కెనడాలోని వీరి ముఠా సభ్యులకు వెళ్లేవి. తర్వాత క్రెడిట్‌కార్డులను ఇష్టానుసారం వాడుకునేవారు. బ్యాంక్‌లకు అనుమానం వచ్చి ఫిర్యాదు చేయడంతో ఈ ముఠా గుట్టు రట్టయ్యింది.