North Korea: అమెరికా సైనికుడిని బంధించిన ఉత్త‌ర కొరియా

North Korea: అమెరికా సైనికుడు త‌మ ఆధీనంలో ఉన్న‌ట్లు నార్త్ కొరియా తెలిపింది. డీమిలిట‌రీ జోన్‌లో ఉన్న అత‌ను అక్ర‌మంగా స‌రిహ‌ద్దు దాటాడు. దీంతో అత‌న్ని ఉత్త‌ర కొరియా అరెస్టు చేసింది.

ప్యోంగ్‌యాంగ్‌: అమెరికా సైనికుడు ట్రావిస్ కింగ్ త‌మ క‌స్ట‌డీలో ఉన్న‌ట్లు ఉత్త‌ర కొరియా(NorthKorea) స్ప‌ష్టం చేసింది. అమెరికా సైనికుడి ఆచూకీ చెప్పాలంటూ ఐక్య‌రాజ్య‌స‌మితి అభ్య‌ర్థ‌న చేసింది. ఆ అభ్య‌ర్థ‌న‌కు ఉత్త‌ర కొరియా స్పందించినట్లు యూఎన్ క‌మాండ్ తెలిపింది. 23 ఏళ్ల ఆ సైనికుడు జూలై 18వ తేదీన ద‌క్షిణ కొరియా బోర్డ‌ర్ నుంచి ఉత్త‌ర కొరియాలోకి చొర‌బ‌డిన‌ట్లు తెలుస్తోంది. అయితే ఈ ద‌శ‌లో ఆ జ‌వాను గురించి ఎక్కువ‌గా చెప్ప‌లేమ‌ని యూఎన్ క‌మాండ్ పేర్కొన్న‌ది. డీమిలిట‌రీ జోన్ నుంచి యూఎన్ క‌మాండ్ ఉత్త‌ర కొరియాతో మాట్లాడిన‌ట్లు తెలుస్తోంది. నిజానికి పీవీ2 కింగ్ అరెస్టు గురించి నార్త్ కొరియా అధికారికంగా ఎటువంటి ప్ర‌క‌ట‌న చేయ‌లేదు. ద‌క్షిణ కొరియాలో రెండు నెల‌లు జైలులో ఉన్న అత‌న్ని జూలై 10న రిలీజ్ చేశారు. ఆ త‌ర్వాత అత‌ను అమెరికాకు వెళ్ల‌కుండా.. డీమిలిట‌రీ జోన్ సైన్యంతో జ‌త‌క‌లిశారు. అక్క‌డ నుంచి అత‌ను ఉత్త‌ర కొరియాలోకి చొర‌బ‌డే ప్ర‌య‌త్నం చేశాడు.