భార‌త ప్ర‌ధానిగా మోదీ ప్ర‌మాణం.. చ‌రిత్ర‌లో ఈరోజు

భార‌త‌దేశం 15 వ‌ ప్ర‌ధానమంత్రిగా న‌రేంద్ర దామోద‌రదాస్ మోదీ 2014 లో స‌రిగ్గా ఇదే రోజున ప్ర‌మాణం చేశారు.

May 26, 2021 / 12:49 PM IST

భార‌త ప్ర‌ధానిగా మోదీ ప్ర‌మాణం.. చ‌రిత్ర‌లో ఈరోజు

భార‌త‌దేశం 15 వ‌ ప్ర‌ధానమంత్రిగా న‌రేంద్ర దామోద‌రదాస్ మోదీ 2014 లో స‌రిగ్గా ఇదే రోజున ప్ర‌మాణం చేశారు. మ‌న దేశానికి స్వాతంత్ర్యం వ‌చ్చిన త‌ర్వాత ఒక కాంగ్రేసేత‌ర‌ పార్టీకి పూర్తి మెజార్టీ వ‌చ్చి కేంద్రంలో ప్ర‌భుత్వం ఏర్పాటు చేయ‌డం ఇదే మొద‌టిసారి.

1984 సాధార‌ణ ఎన్నిక‌ల్లో 404 సీట్లు గెలుచుకుని కాంగ్రెస్ త‌న‌కు తిరుగులేద‌ని నిరూపించుకున్న‌ది. ఈ ఎన్నిక‌ల్లో బీజేపీకి కేవలం రెండే సీట్లు వ‌చ్చాయి. 30 ఏండ్ల త‌ర్వాత జ‌రిగిన జ‌న‌ర‌ల్ ఎల‌క్ష‌న్స్‌లో రెండు సీట్ల నుంచి బీజేపీ 282 సీట్ల‌కు చేరుకున్న‌ది. ఈ ఎన్నిక‌ల్లో కాంగ్రెస్ 44 స్థానాల‌కు ప‌డిపోయింది. మ‌రికొన్ని పార్టీలు కూట‌మిగా బీజేపీ ఎన్డీఏ ప్ర‌భుత్వాన్ని ఏర్పాటుచేసింది. త‌ర్వాత ఎన్నిక‌ల్లో మ‌రోసారి త‌మ‌కు తామే సాటి అని నిరూపించుకుంటూ 303 సీట్ల‌తో బీజేపీ విజ‌య‌ఢంకా మోగించి రెండోసారి కేంద్రంలో అధికారంలోకి వ‌చ్చింది.

కేంద్రంలో బీజేపీ కూట‌మి అధికారంలోకి రావ‌డానికి ముందు కాంగ్రెస్‌కు సవాళ్లు పెరిగాయి. లోక్‌పాల్ బిల్లు తేవాలంటూ అన్నా హ‌జారే దీక్ష‌లు కాంగ్రెస్‌కు ఇబ్బందిక‌రంగా త‌యారైంది. మరోవైపు, బీజేపీపై ప్ర‌జ‌ల్లో విశ్వాసం పెరుగుతూ వ‌స్తున్న‌ది. ప్రధాని పదవికి నరేంద్ర మోదీ పేరును బీజేపీ ప్ర‌క‌టించింది. అయితే, కాంగ్రెస్ స‌హా ఇత‌ర ప్ర‌తిప‌క్ష పార్టీల్లో స‌రైన నాయ‌కత్వం లేక‌పోవ‌డం, ఐక్యత కొర‌వడం వంటి కార‌ణాల‌తో న‌రేంద్ర మోదీ నేతృత్వంలో బీజేపీ భారీ మెజార్టీ సాధించి కేంద్రంలో ఎన్డీఏ ప్ర‌భుత్వాన్ని ఏర్పాటుచేసి చ‌రిత్ర సృష్టించింది.