WHO on Monkeypox | కరోనా ప్రభావంతో ఇప్పటికే అల్లాడుతున్న ప్రపంచ దేశాలను మంకీ ఫాక్స్ వణికిస్తున్నది. 27 దేశాల్లో మంకీ ఫాక్స్ కేసులు 780 కేసులు నమోదు కావడం పట్ల ప్రపంచ ఆరోగ్య సంస్థ (డబ్ల్యూహెచ్వో) మరోమారు ఆందోళన వ్యక్తం చేసింది. దీని నివారణకు తీసుకోవాల్సిన చర్యలపై డబ్ల్యూహెచ్వో అధికారి మరియా వాన్కెర్కోవ్ సూచనలు చేశారు. మంకీ పాక్స్ వైరస్ ఏమిటి? ఎలా వ్యాపిస్తుందన్న అంశాలపై మెడికల్ అండ్ హెల్త్ ఉద్యోగులు, పౌర సమాజంలో అవగాహన పెంపొందించాలని సూచించారు. వైద్య సదుపాయాల సాయంతో వైరస్ను గుర్తించొచ్చునన్నారు. వైరస్ సోకిందని భావిస్తున్న అనుమానితులతోపాటు వారిని కలిసిన వారిని ఐసోలేషన్ వార్డులకు తరలించడం అవసరం అని చెప్పారు.
ఇందుకోసం స్థానికులతో మాట్లాడి, అవగాహన కల్పించడం చాలా ముఖ్యమని మరియా వాన్కెర్కోవ్ పేర్కొన్నారు. మంకీ పాక్స్ బాధితుల నుంచి నమూనాలు సేకరించి, పరీక్షలు జరిపేవారు, బాధితులకు వైద్య సేవలందించే ఫ్రంట్లైన్ వర్కర్లకు రక్షణ కల్పించాల్సి ఉందన్నారు. ఈ వైరస్ గురించి తగిన సమాచారం అంతా తెలుసుకోవాలన్నారు.
ఈ వైరస్ బారిన పడిన వారికి చికిత్స అందించడానికి అన్ని రకాల పద్దతులు అవలంభించాలని మరియా వాన్కెర్కోవ్ స్పష్టం చేశారు. యాంటీ వైరల్ ఔషధాలు, టీకాలు అందుబాటులో ఉన్నాయని తెలిపారు. అయితే వాటిని జాగ్రత్తగా వినియోగించాలని సూచించారు. అలాగే మంకీ పాక్స్ వైరస్ గురించి పూర్తి డేటా విశ్లేషించి చర్యలు తీసుకోవాలని పేర్కొన్నారు. పరిశోధనలు ముమ్మరం చేయాలని తెలిపారు.