Love Propose | ప్రేమ రెండు మనసుల మధ్య చిగురించేది. ఆ రెండు మనసులు ఏకమైతే ఎక్కడికైనా వెళ్లొచ్చు. కానీ అంతకంటే ముందు జరిగే లవ్ ప్రపోజల్ అనేది చాలా ముఖ్యం. ఎందుకంటే.. ఆ ప్రపోజల్ జీవితాంతం తీపి గుర్తుగా ఉండాలని ప్రతి ప్రేమికుడు ఆరాట పడుతుంటారు. అందుకే వినూత్నంగా లవ్ ప్రపోజల్ చేస్తుంటారు. ఈ ప్రేమికుడు కూడా వినూత్నంగా లవ్ ప్రపోజల్ చేయాలనుకుని సముద్రం వద్దకు వెళ్లాడు. అక్కడ తన ప్రేయసితో కలిసి బోటులో షికారుకు వెళ్లాడు. సముద్రం మధ్యలో, చల్లని గాలులను ఆస్వాదిస్తూ ఆలింగనాలతో మునిగిపోయింది ఆ జంట. సూర్యుడు అస్తమిస్తున్న సమయంలో ప్రేమికుడు తన ప్రేయసికి ఐ లవ్ యూ చెప్పేందుకు సిద్ధమయ్యాడు. కానీ అక్కడే అనుకోని ఘటన జరిగింది. కాసేపు ఆ జంట తీవ్ర గందరగోళానికి గురైంది.
అదేంటంటే.. ప్రియుడు స్కాట్ క్లెయిన్ తన ప్రియురాలి వేలికి ఉంగరం తొడిగేందుకు తన జేబులో నుంచి ఆ ఉంగరాన్ని బయటకు తీశాడు. కానీ ఆ రింగ్ నీటిలో పడిపోయింది. క్షణం కూడా ఆలోచించకుండా క్లెయిన్ నీటిలో దూకేశాడు. ప్రేయసితో పాటు అక్కడున్న మరో ఇద్దరు ఆందోళనకు గురయ్యారు. ఉంగరం బాక్స్ నీటిపై తేలియాడంతో క్షణాల్లోనే దాన్ని పట్టుకున్నాడు క్లెయిన్. ఇక ఆ ఉంగరాన్ని బోటులో ఉన్న వ్యక్తికి అందించాడు. అనంతరం అతను బోటులోకి వచ్చేశాడు. ఆ తర్వాత ప్రియురాలు సుజీ టక్కర్ వేలికి ఆ రింగ్ను తొడిగి లవ్ ప్రపోజ్ చేశాడు. ఆమె అతని ప్రేమను అంగీకరించి, ముద్దులతో ముంచెత్తింది.
ఈ వీడియోను స్కాట్ క్లెయిన్ తన ఫేస్బుక్ ఖాతాలో షేర్ చేశాడు. ఇది 100 శాతం నిజం, 100 శాతం నా అదృష్టం. 100 శాతం ఎప్పటికీ మరిచిపోను అని రాసుకొచ్చాడు. ప్రస్తుతం ఈ వీడియో నెట్టింట వైరల్ అవుతోంది. వారి ప్రేమను అభినందిస్తూ ప్రశంసల వర్షం కురిపిస్తున్నారు. ప్రియుడు ఇలా ఉండాలని కొనియాడుతున్నారు. ఆమె అదృష్టవంతురాలు అని పేర్కొంటున్నారు.