సిడ్నీ: ఆకాశంలో ఎగురుతున్న విమానం అకస్మాత్తుగా ఎత్తు కోల్పోయింది. విమానంలోని ప్రయాణికులు చెల్లాచెదురుగా పడ్డారు. సుమారు 50 మంది గాయపడ్డారు. పరిస్థితి సీరియస్గా ఉన్న పది మందిని అనంతరం హాస్పిటల్లో అడ్మిట్ చేశారు. (Latam Flight Loses Altitude) సోమవారం చిలీ దేశానికి చెందిన ఎయిర్లైన్ సంస్థ లాటమ్ విమానం ఆస్ట్రేలియాలోని సిడ్నీ నుంచి న్యూజిల్యాండ్లోని ఆక్లాండ్కు బయలుదేరింది. గాలిలో ఎగురుతున్న విమానం ఉన్నట్టుండి ఎత్తు కోల్పోయింది. దీంతో భారీగా కుదుపులకు గురైంది. విమానంలోని ప్రయాణికులు, సిబ్బంది తమ సీట్ల నుంచి ఎగిరిపడ్డారు. కొందరు విమానం రూఫ్కు గుద్దుకున్నారు. ఈ సంఘటనలో సుమారు 50 మంది ప్రయాణికులు గాయపడ్డారు.
కాగా, ఆ విమానం సోమవారం సాయంత్రం ఆక్లాండ్ ఎయిర్పోర్ట్లో సురక్షితంగా ల్యాండ్ అయ్యింది. తీవ్రంగా గాయపడి పరిస్థితి సీరియస్గా ఉన్న ఏడుగురు ప్రయాణికులు, ముగ్గురు సిబ్బందిని వెంటనే హాస్పిటల్కు తరలించారు. విమానం ఫ్లోర్లో రక్తం మరకలు కనిపించాయని, తాము చాలా భయాందోళన చెందామని కొందరు ప్రయాణికులు తెలిపారు. మరోవైపు సాంకేతిక సమస్య వల్ల విమానం ఎత్తు కోల్పోయి భారీ కుదుపులకు గురైందని లాటమ్ ఎయిర్లైన్స్ పేర్కొంది.