Iran | షరతులకు ఒప్పుకొంటే వారంలో హొర్ముజ్‌ తెరుస్తాం.. అమెరికాకు ఇరాన్‌ మరోసారి ప్రతిపాదన

షరతులతో కూడిన తమ ప్రతిపాదనను అమెరికా అంగీకరిస్తే ఏడు రోజుల్లోగా హొర్ముజ్‌ జలసంధిని తిరిగి తెరుస్తామని ఇరాన్‌ విదేశాంగ మంత్రి అబ్బాస్‌ అరాగ్చీ ఆదివారం తెలిపారు.

• అమెరికాకు ఇరాన్‌ మరోసారి ప్రతిపాదన

బాగ్దాద్‌: షరతులతో కూడిన తమ ప్రతిపాదనను అమెరికా అంగీకరిస్తే ఏడు రోజుల్లోగా హొర్ముజ్‌ జలసంధిని తిరిగి తెరుస్తామని ఇరాన్‌ విదేశాంగ మంత్రి అబ్బాస్‌ అరాగ్చీ ఆదివారం తెలిపారు. అయితే అందుకు సంబంధించిన ఒప్పందం చేసుకొనే విషయంలో అమెరికాలో నిజాయితీ లోపించిందని ఆయన ఆరోపించారు.

ఇస్లామిక్‌ సహకార సంస్థ సమావేశానికి హాజరయ్యేందుకు బాగ్దాద్‌ వచ్చిన ఆయన ఇరాన్‌ మీడియా సంస్థలతో మాట్లాడుతూ ఈ విషయాన్ని వెల్లడించారు. తాము విధించిన ఏడు నిబంధనలపై అమెరికా స్పందన కొరవడిందని గత వారం ఇరాన్‌ విమర్శించింది. ఇరు దేశాల మధ్య జరుగుతున్న యుద్ధం ముగింపునకు జరుగుతున్న దౌత్య ప్రయత్నాలను అమెరికా బలహీనపరుస్తున్నదని అరాగ్చీ ఆరోపించారు. తాము ఒత్తిడిని అంగీకరించబోమన్నారు.