Indus Water Treaty: సింధు జల ఒప్పందానికి 61 ఏండ్లు

Indus Water Treaty : భారతదేశం-పాకిస్తాన్ మధ్య సింధు జల ఒప్పందంపై సంతకాలు చేసి ఇవాల్టికి 61 ఏండ్లు పూర్తయ్యాయి. 1960 లో జరిగిన ఈ ఒప్పందంపై...

September 19, 2021 / 12:48 PM IST

Indus Water Treaty: సింధు జల ఒప్పందానికి 61 ఏండ్లు

భారతదేశం-పాకిస్తాన్ మధ్య సింధు జల ఒప్పందంపై (Indus Water Treaty) సంతకాలు చేసి ఇవాల్టికి 61 ఏండ్లు పూర్తయ్యాయి. 1960 లో జరిగిన ఈ ఒప్పందంపై రెండు దేశాల ప్రధానులు జవహర్‌లాల్ నెహ్రూ, అయూబ్‌ఖాన్‌ సంతకాలు చేశారు. రెండు దేశాల మధ్య 6 నదులకు సంబంధించిన నీటి పంపకాల వివాదాలకు పరిష్కారంగా ఈ ఒప్పందం జరిగింది. రెండు దేశాల మధ్య ఇప్పటికీ అనేక వివాదాలు ఉన్నప్పటికీ.. ఈ ఒప్పందంపై ఎలాంటి ప్రభావం లేకపోవడం విశేషం.

సింధు నది విస్తీర్ణం దాదాపు 11.2 లక్షల కి.మీ. ఈ ప్రాంతం పాకిస్తాన్ (47 శాతం), భారతదేశం (39 శాతం), చైనా (8 శాతం), ఆఫ్ఘనిస్తాన్ (6 శాతం) లో ఉన్నది. సింధు నది పరిసర ప్రాంతాల్లో దాదాపు 30 కోట్ల మంది నివసిస్తున్నారు. విభజన సమయంలో సింధు నది లోయ, దాని కాలువలను కూడా విభజించారు. అయితే పాకిస్తాన్ దాని నీటి వాటా కోసం పూర్తిగా భారత్‌పై ఆధారపడి ఉన్నది.

పాకిస్తాన్‌కు నీటి సరఫరా కోసం 1948 మార్చి 31 నాటికి పాకిస్తాన్‌కు కొంత వాటా ఇవ్వాలని నిర్ణయించారు. 1948 ఏప్రిల్ 1 న, భారతదేశం కాలువల నీటిని నిలిపివేసింది. దాంతో పాకిస్తాన్‌లో పరిస్థితి మరింత దిగజారింది. రెండు దేశాల మధ్య పలు దఫాలుగా సమావేశాలు జరిగాయి. చివరకు సింధు జలాల ఒప్పందంపై ఇరు దేశాలు సంతకాలు చేశాయి.

ఈ ఒప్పందం ప్రకారం, సింధు నది లోయలోని నదులను తూర్పు, పశ్చిమ నదులుగా విభజించారు. తూర్పు ప్రాంతంలోని మూడు నదులు – రవి, బియాస్, సట్లెజ్.. భారతదేశానికి.. సింధు, చీనాబ్, జీలం నదులను పాకిస్తాన్‌కు ఇచ్చారు. పాకిస్తాన్‌లోని నదుల నీటిని విద్యుత్, నీటిపారుదలకు పరిమితంగా ఉపయోగించుకునే హక్కు కూడా భారతదేశానికి ఉన్నది. ఐదేండ్ల క్రితం యురిలో భారతీయ సైనికులను ఉగ్రవాదులు బాంబులతో హతమార్చిన సమయంలో ఈ ఒప్పందాన్ని భారతదేశం రద్దు చేయాలనే డిమాండ్ వచ్చింది.