Sudan | సూడాన్‌లో దయనీయంగా మహిళల పరిస్థితి.. ఆహారం కోసం సైనికులతో బలవంతంగా శృంగారం

యుద్ధంతో ఛిన్నాభిన్నమైన సూడాన్‌లో మహిళల పరిస్థితి అత్యంత దయనీయంగా మారింది. ఆహారం కోసం వారు బలవంతంగా సైనికులతో శృంగారంలో పాల్గొనాల్సి వస్తున్నట్టు ‘గార్డియన్‌' పత్రిక వెల్లడించింది.

Sudan | ఖార్టూమ్‌, జూలై 22: యుద్ధంతో ఛిన్నాభిన్నమైన సూడాన్‌లో మహిళల పరిస్థితి అత్యంత దయనీయంగా మారింది. ఆహారం కోసం వారు బలవంతంగా సైనికులతో శృంగారంలో పాల్గొనాల్సి వస్తున్నట్టు ‘గార్డియన్‌’ పత్రిక వెల్లడించింది. తమ కుటుంబాల పోషణ కోసం ఆహారాన్ని లేదా సరుకులను పొందాలంటే సైనికుల కామవాంఛలను తీర్చడం మినహా మరో మార్గం లేకపోయిందని ఒండుర్మన్‌ నగరం నుంచి పారిపోయి వచ్చిన రెండు డజన్ల మందికిపైగా మహిళలు వాపోయినట్టు పేర్కొన్నది.

ఒండుర్మన్‌ నగరంలో ఆహార నిల్వలున్న దాదాపు అన్ని కర్మాగారాల్లో ఇలాంటి దారుణాలు జరుగుతున్నాయని ఓ మహిళ ఆవేదన వ్యక్తం చేసినట్టు తెలిపింది. ‘ఎంతో వృద్ధులైన నా తల్లిదండ్రులిద్దరూ అనారోగ్యంతో బాధపడుతున్నారు. ఆహార సేకరణ కోసం నా కుమార్తెను ఎన్నడూ బయటికి పంపలేదు. అందుకు బదులుగా నేనే సైనికుల వద్దకు వెళ్లా. ఆహారాన్ని పొందేందుకు ఇంతకంటే వేరే గత్యంతరం లేకపోయింది’ అంటూ ఓ మాంసం శుద్ధి కర్మాగారం వద్ద బలవంతంగా సైనికులతో శృంగారంలో పాల్గొన్న ఓ మహిళ కన్నీటిపర్యంతమైనట్టు ‘గార్డియన్‌’ వివరించింది.