Sudan | ఒకపూట కడుపు నింపుకోవాలన్నా.. సైనికుల లైంగిక వాంఛ తీర్చాల్సిందే.. ఇదీ సుడాన్‌ మహిళల దుర్భర దుస్థితి

Sudan | సైన్యం, పారామిలిటరీ మధ్య ఘర్షణతో ఆఫ్రికా దేశమైన సూడాన్‌ (Sudan)లో మహిళలు దుర్భర పరిస్థితులు అనుభవిస్తున్నారు.

Sudan | సైన్యం, పారామిలిటరీ మధ్య ఘర్షణతో ఆఫ్రికా దేశమైన సూడాన్‌ (Sudan)లో మహిళలు దుర్భర పరిస్థితులు అనుభవిస్తున్నారు. తినడానికి కూడా తిండిలేక తీవ్ర అవస్థలు పడుతున్నారు. ఒకపూట కడుపు నింపుకోవాలన్నా సైన్యం చేతిల్లో లైంగికంగా నలిగిపోవాల్సిన దుస్థితి. సైనికుల లైంగిక వాంఛలు తీరిస్తేనే వారికి ఆహారం దొరికే పరిస్థితి. మహిళలే స్వయంగా వారి గోడును ది గార్డియన్‌ ముందు వెళ్లబోసుకున్నారు.

సూడాన్‌లో గతేడాది శక్తిమంతమైన పారామిలిటరీ, సైన్యం మధ్య యుద్ధం మొదలైన విషయం తెలిసిందే. ఈ యుద్ధం కారణంగా చాలా మంది ఆ దేశాన్ని వీడి వలసవెళ్లిపోయారు. ఇక సూడాన్‌లోని ఒమ్దుర్‌మన్‌ (Omdurman) పట్టణం కూడా చాలా వరకూ ఖాళీ అయిపోయింది. చాలా మంది అక్కడి నుంచి పారిపోగా.. డజనుకుపైగా మహిళలు వారి కుటుంబ సభ్యులతో కలిసి అక్కడే చిక్కుకుపోయారు. ఇక అప్పటి నుంచి వారు దుర్భర జీవితాన్ని గడుపుతున్నారు. ఇక్కడ ఆహారం మొత్తం సైన్యం చేతుల్లోనే ఉంటుంది. దీంతో ఆహారం కావాలంటే మహిళలు వారి లైంగిక వాంఛలు తీర్చాల్సిన పరిస్థితి.

ఆహారం మాత్రమే కాదు.. ఇతర వస్తువులు కావాలన్నా సరే వారి చేతుల్లో లైంగికంగా నలిగిపోవాల్సిందే. ‘నా తల్లిదండ్రులు ఇద్దరూ వృద్ధులు. అనారోగ్యంతో ఉన్నారు. నా కుమార్తెను బయటకు పంపలేను. వారిని పోషించేందుకు ఆహారం కావాలంటే నాకు ఉన్న మార్గం అదొక్కటే’ అంటూ ఓ బాధిత మహిళ ఆవేదన వ్యక్తం చేసింది. ‘పిల్లల కడుపు నింపాలంటే.. ఇదొక్కటే మార్గం’ అని మరో మహిళ వాపోయింది.

ఇక కొందరు సైనికులు అక్కడున్న మహిళల్ని పాడుపడిన ఇళ్ల వద్దకు తీసుకొచ్చి వరుసగా నిల్చోబెట్టి ఎవరుకావాలో ఎంచుకుని మరీ ఈ దుశ్చర్యకు పాల్పడుతున్నట్లు స్థానికులు చెబుతున్నారు. దేశంలో అంతర్యుద్ధం ప్రారంభమైనప్పటి నుంచీ అక్కడ ఇదే పరిస్థితి అని వాపోతున్నారు. అయితే, తాము ఏమీ చేయలేని పరిస్థితి అని ఆవేదన వ్యక్తం చేశారు.

కాగా, సైన్యం, పారామిలిటరీ మధ్య గతేడాది ఏప్రిల్‌ 15న యుద్ధం ప్రారంభమైన విషయం తెలిసిందే. ఈ ఆధిపత్య పోరులో అనేక మంది అమాయక ప్రజలు ప్రాణాలు కోల్పోయారు. అంతర్జాతీయ మీడియా నివేదిక ప్రకారం.. ఇప్పటి వరకూ ఈ యుద్ధం కారణంగా 150,000 మంది ప్రాణాలు కోల్పోగా.. వేల సంఖ్యలో ప్రజలు గాయపడ్డారు.

Also Read..

Mumbai Rains | ముంబైని ముంచెత్తుతున్న భారీ వర్షాలు.. హై టైడ్‌ అలర్ట్‌ ప్రకటించిన అధికారులు

KH Muniyappa | కర్ణాటక మంత్రి అల్లుడి కోసం.. అసెంబ్లీలో మరో కార్యదర్శి కొలువు

August 15 Movies | ఆగస్టు 15న సినిమాల జాతర..! ఏమేం రిలీజు అవుతున్నాయంటే?