ర‌ష్యా ద‌గ్గ‌ర ఎన్ని.. నాటో దగ్గ‌ర ఎన్ని అణు బాంబులున్నాయి?

న్యూయార్క్‌: ఉక్రెయిన్‌పై యుద్ధానికి వెళ్లిన ర‌ష్యా అధ్య‌క్షుడు పుతిన్‌.. అణ్వాయుధాల‌ను సిద్ధం చేసుకోవాల‌ని ఆదేశించిన విష‌యం తెలిసిందే. పుతిన్ ఇచ్చిన సంకేతాలు కొన్ని దేశాల‌ను భ‌య‌ప‌ట్టిస్తున్నాయి. కానీ ఇంత‌కీ ర‌ష్యా ద‌గ్గ‌ర ఎన్ని అణు బాంబులు ఉన్నాయో తెలుసా. అమెరికా సైంటిస్టుల ఫెడ‌రేష‌న్ ప్రకారం ర‌ష్యా వ‌ద్ద 5977 అణ్వాయుధాలు ఉన్నాయి. అణు విస్పోట‌నం చెందే ఆ బాంబుల్లో సుమారు 1500 బాంబులు ప‌నిచేయ‌వ‌ని సైంటిస్టులు చెబుతున్నారు. ఇక మిగిలిన 4500 అణ్వాయుధాల్లో.. చాలా వర‌కు స్ట్రాట‌జిక్ న్యూక్లియ‌ర్ వెప‌న్స్ ఉన్నాయి. అంటే బాలిస్టిక్ మిస్సైళ్లు, రాకెట్లు. వీటిని సుదూర ల‌క్ష్యాల‌ను చేధించేందుకు వినియోగిస్తారు. న్యూక్లియ‌ర్ వార్‌లో ఇలాంటి ఆయుధాల‌ను ఎక్కువ‌గా వాడుతారు.

ర‌ష్యా వ‌ద్ద ప్ర‌స్తుతం 1185 ఖండాంత‌ర బాలిస్టిక్ క్షిప‌ణులు, 800 స‌బ్‌మెరైన్ మిస్సైళ్లు, 580 ఎయిర్ లాంచ‌ర్ న్యూక్లియ‌ర్ బాంబ‌ర్లు ఉన్నాయి. నిపుణుల అంచ‌నా ప్ర‌కారం.. ఉక్రెయిన్‌పై యుద్ధం ప్ర‌క‌టించిన ర‌ష్యా ప్ర‌స్తుతం 1500 వార్‌హెడ్స్‌ను ఎక్కుపెట్టిన‌ట్లు తెలుస్తోంది. మిస్సైల్ లేదా బాంబ‌ర్ లేదా స‌బ్‌మెరైన్ బేస్‌ల వ‌ద్ద ఆ అణ్వస్త్రాలను సిద్ధం చేసి ఉంచారు. చైనా, ఫ్రాన్స్‌, ఇండియా, ఇజ్రాయిల్‌, నార్త్ కొరియా, పాకిస్థాన్‌, ర‌ష్యా, అమెరికా, బ్రిట‌న్ వ‌ద్ద అణ్వాయుధాలు ఉన్నాయి.

ఇక నాటో దేశాల వ‌ద్ద 5943 అణ్వాయుధాలు ఉన్న‌ట్లు తెలుస్తోంది. ర‌ష్యాకు ధీటుగా నాటో దేశాల వ‌ద్ద అణ్వ‌స్త్రాలు ఉన్నాయి. దీంట్లో అమెరికా వ‌ద్ద 5428, ఫ్రాన్స్ వ‌ద్ద 290, బ్రిట‌న్ వ‌ద్ద 225 అణు బాంబులు ఉన్నాయి. చైనా వ‌ద్ద 350, పాకిస్థాన్ వ‌ద్ద 165, ఇండియా వ‌ద్ద 160, ఇజ్రాయిల్ వ‌ద్ద 90, నార్త్ కొరియా వ‌ద్ద 20 న్యూక్లియ‌ర్ వార్‌హెడ్స్ ఉన్నాయి.