ఉక్రెయిన్‌లో షూటింగ్‌కు వెళ్లి.. న‌డుచుకుంటూ బోర్డ‌ర్ దాటిన‌ హాలీవుడ్ హీరో

కీవ్‌: హాలీవుడ్ హీరో, ఆస్కార్ విన్న‌ర్ సీన్ పెన్‌.. ఉక్రెయిన్‌లో షూటింగ్ కోసం వెళ్లి తెగ ఇబ్బందులుప‌డ్డారు. ఉక్రెయిన్‌పై ర‌ష్యా ఆక్ర‌మ‌ణ గురించి డాక్యుమెంట‌రీ తీసేందుకు కీవ్‌కు వెళ్లిన 61 ఏళ్ల సీన్ పెన్ ఆ న‌గ‌రం నుంచి బ‌య‌ట‌ప‌డేందుకు క‌ఠిన ప‌రిస్థితుల్ని ఎదుర్కోవాల్సి వ‌చ్చింది. కీవ్‌ను ర‌ష్యా సేన‌లు ముట్ట‌డి చేస్తున్న‌ట్లు స‌మాచారం రావ‌డంతో.. సీన్ పెన్ త‌న సూట్‌కేస్‌ల‌తో ఆ న‌గ‌రం నుంచి వ‌ల‌స బాట ప‌ట్టారు. బ్యాక్‌ప్యాక్, ల‌గేజీతో ఆ హీరో.. పోలాండ్ బోర్డ‌ర్ దిశ‌గా వెళ్లారు.

ఓ ద‌గ్గ‌ర ట్రాఫిక్ జామ్ కావ‌డంతో.. త‌న కారును అక్క‌డే వ‌దిలేసి పోలాండ్ బోర్డ‌ర్‌కు కొన్ని కిలోమీట‌ర్ల దూరం న‌డుచుకుంటూ వెళ్లారు. పెన్‌తో పాటు మ‌రో ఇద్ద‌రు వ్య‌క్తులు ఉన్నారు. అయితే క్షేమంగానే సీన్ పెన్ ఉక్రెయిన్ వీడిన‌ట్లు ఆయ‌న అనుచ‌రులుతెలిపారు. మిస్టిక్ రివ‌ర్‌, మిల్క్ చిత్రాల్లో న‌టించిన సీన్ పెన్‌కు ఆస్కార్ అవార్డులు ద‌క్కాయి. ఇన్ టు ద వైల్డ్‌, ద క్రాసింగ్ గార్డ్ చిత్రాల‌కు ఆయ‌న డైరెక్ట‌ర్‌గా చేశారు. హరికేన్ క‌త్రినా, హైతీ భూకంపం, పాకిస్థాన్ వ‌ర‌ద‌ల స‌మ‌యంలో సీన్ పెన్ రిలీఫ్ వ‌ర్క్‌లో పాల్గొన్నారు.