Visit:
వాషింగ్టన్, జూన్ 6: ఇప్పటికే దరఖాస్తు ఫీజును భారీగా పెంచేసి హెచ్-1బీ వీసా లభ్యతను ట్రంప్ ప్రభుత్వం కఠినతరం చేసిన క్రమంలో దాని పూర్తి ప్రక్షాళనకు మరో ప్రయత్నం ప్రారంభమైంది. అమెరికాలో శాశ్వత నివాసం పొందే మార్గంగా హెచ్-1బీ వీసాను వినియోగించడాన్ని ముగించాలని, ఆ విధానాన్ని సమూలంగా సంస్కరించాలని కోరుతూ యూఎస్ కాంగ్రెస్లో ఒక ముసాయిదా బిల్లును ప్రవేశపెట్టారు. కరుడు గట్టిన రిపబ్లికన్ సభ్యుడు చిప్ రాయ్ ‘అమెరికన్ వైట్ కాలర్ జాబ్స్ చట్టం’ పేరుతో గురువారం యూఎస్ కాంగ్రెస్లో ఈ ముసాయిదా బిల్లును ప్రవేశపెట్టారు. ‘ఓపీటీ కార్యక్రమాన్ని కూడా రద్దు చేయాలి. సంస్థలు చవగ్గా వచ్చే విదేశీ కార్మికులను నియమించుకుంటున్నాయి. ఇప్పటివరకు ఉన్న ఈ వీసా లాటరీ విధానానికి స్వస్తి పలికి ప్రతిభ ఉన్న వారినే నియమించి, వేతనాల చెల్లింపులో ప్రామాణికత పాటించాలి’ అని బిల్లు ప్రవేశపెట్టే ముందు చిప్ రాయ్ పేర్కొన్నారు.
